കുപ്പർട്ടിനോ ആസ്ഥാനമായുള്ള ആപ്പിൾ കമ്പനി, തങ്ങളുടെ ആപ്പിൾ ഇന്റലിജൻസ് ഫീച്ചറുകളുടെ പേരിൽ ഉപഭോക്താക്കളെ തെറ്റിദ്ധരിപ്പിച്ചുവെന്ന കേസ് വൻ തുക നൽകി ഒത്തുതീർപ്പാക്കുന്നു. പരിഷ്‌കരിച്ച സിരിയുടെ അപ്‌ഡേറ്റ് 2024-ൽ പുറത്തിറക്കുമെന്ന് കമ്പനി വാഗ്ദാനം ചെയ്തിരുന്നുവെങ്കിലും അത് പാലിക്കാൻ സാധിക്കാതെ വന്നതോടെയാണ് നിയമനടപടികൾ നേരിടേണ്ടി വന്നത്. കേസ് ഒത്തുതീർപ്പാക്കുന്നതിന്റെ ഭാഗമായി 250 മില്യൺ ഡോളർ നൽകാൻ ആപ്പിൾ സമ്മതമറിയിച്ചു. ഇതുപ്രകാരം 2024 ജൂണിനും 2025 മാർച്ചിനുമിടയിൽ ഐഫോൺ 15, ഐഫോൺ 16 സീരീസ് ഫോണുകൾ വാങ്ങിയ ഉപഭോക്താക്കൾക്ക് 25 ഡോളർ മുതൽ 95 ഡോളർ വരെ നഷ്ടപരിഹാരമായി ലഭിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. നിയമപരമായ തെറ്റുകൾ ഔദ്യോഗികമായി സമ്മതിക്കുന്നില്ലെങ്കിലും പണം നൽകി കേസ് അവസാനിപ്പിക്കാനാണ് ആപ്പിളിന്റെ തീരുമാനം.

2024-ൽ തന്നെ സിരിയുടെ കൂടുതൽ കരുത്തുറ്റ പതിപ്പ് അവതരിപ്പിക്കുമെന്നായിരുന്നു ആപ്പിളിന്റെ പ്രഖ്യാപനം. എന്നാൽ സാങ്കേതികമായ വിവിധ കാരണങ്ങളാൽ ഈ അപ്‌ഡേറ്റ് സമയബന്ധിതമായി പുറത്തിറക്കാൻ കമ്പനിക്ക് സാധിച്ചില്ല. ആപ്പിൾ ഇന്റലിജൻസിനായുള്ള കാത്തിരിപ്പ് നീളുന്ന സാഹചര്യത്തിൽ, ഗൂഗിളിന്റെ ജെമിനിയുമായി ചേർന്ന് പുതിയ ആർട്ടിഫിഷ്യൽ ഇന്റലിജൻസ് ഫീച്ചറുകൾ ഫോണുകളിൽ എത്തിക്കാനുള്ള ചർച്ചകൾ ആപ്പിൾ സജീവമാക്കിയിട്ടുണ്ട്. നിലവിലെ പ്രതിസന്ധികൾക്കിടയിലും, സിരിയുടെ പരിഷ്കരിച്ച പതിപ്പ് വരാനിരിക്കുന്ന ജൂണിലെ ഡെവലപ്പർ കോൺഫറൻസിൽ ആപ്പിൾ അവതരിപ്പിക്കുമെന്നാണ് സൂചന. സ്വന്തം എഐ സാങ്കേതികവിദ്യ പൂർണ്ണതയിലെത്തുന്നത് വരെ ഗൂഗിളുമായുള്ള സഹകരണം ആപ്പിളിന് വലിയ ആശ്വാസമാകുമെന്നാണ് വിപണിയിലെ വിലയിരുത്തൽ. തുടർച്ചയായ പരാതികളും നിയമനടപടികളും കമ്പനിയുടെ സൽപ്പേരിനെ ബാധിക്കുമെന്നതിനാലാണ് ഇത്രയും വലിയ തുക നൽകി കേസ് ഒത്തുതീർക്കാൻ ആപ്പിൾ മുൻകൈ എടുത്തത്.