ദോഹ: ഖത്തറിലെ അൽ വക്ര തുറമുഖത്ത് നങ്കൂരമിട്ടിരുന്ന ബോട്ടിന് തീപിടിച്ചു. പെട്ടെന്നുണ്ടായ തീപിടിത്തം സിവിൽ ഡിഫൻസ് സംഘം സമയബന്ധിതമായി ഇടപെട്ട് നിയന്ത്രണവിധേയമാക്കി. സംഭവത്തിൽ ആർക്കും പരിക്കേറ്റിട്ടില്ലെന്ന് ഖത്തർ ആഭ്യന്തര മന്ത്രാലയം സ്ഥിരീകരിച്ചു.
അടിയന്തരമായി നടത്തിയ രക്ഷാപ്രവർത്തനത്തെ തുടർന്ന് വലിയ അപകടം ഒഴിവാക്കാനായെന്നാണ് അധികൃതർ വ്യക്തമാക്കുന്നത്. തീപിടിത്തത്തിന്റെ കൃത്യമായ കാരണം, ബോട്ടിന്റെ ഇനം, സംഭവത്തിൽ ഉണ്ടായ നാശനഷ്ടത്തിന്റെ വ്യാപ്തി എന്നിവ സംബന്ധിച്ച കൂടുതൽ വിവരങ്ങൾ ആഭ്യന്തര മന്ത്രാലയം പുറത്തുവിട്ടിട്ടില്ല.
ഗൾഫ് മേഖലയിൽ ഇറാനും അമേരിക്കയും തമ്മിലുള്ള സംഘർഷം തുടരുന്നതിനിടെയാണ് അൽ വക്ര തുറമുഖത്തെ സംഭവം. ഹോർമൂസ് കടലിടുക്കുമായി ബന്ധപ്പെട്ട് മേഖലയിൽ ഉയർന്ന ജാഗ്രത തുടരുന്ന സാഹചര്യത്തിലാണ് തീപിടിത്തമുണ്ടായത്.
മേഖലയിൽ സമാധാനം പുനഃസ്ഥാപിക്കുന്നതിന്റെ ഭാഗമായി ജൂണിൽ പ്രത്യേക ധാരണാപത്രം ഒപ്പുവെച്ചിരുന്നെങ്കിലും സുരക്ഷാ സാഹചര്യങ്ങൾ കണക്കിലെടുത്ത് ജാഗ്രത തുടരുകയാണ്.
