നിയമസഭാ തിരഞ്ഞെടുപ്പിൽ കോഴിക്കോട് ജില്ലയിലുണ്ടായ തിരിച്ചടിക്ക് പിന്നാലെ ഇടത് മുന്നണിയിൽ പരസ്യമായ പോര് മുറുകുകയാണ്. എലത്തൂരിലെ അപ്രതീക്ഷിത തോൽവിയുടെ ഉത്തരവാദിത്തം എ.കെ. ശശീന്ദ്രനാണെന്ന് ആരോപിച്ച് എൻസിപി എലത്തൂർ ബ്ലോക്ക് കമ്മിറ്റി തന്നെ നേരിട്ട് രംഗത്തെത്തി. തിരഞ്ഞെടുപ്പിൽ ശശീന്ദ്രൻ തോൽവി ചോദിച്ചു വാങ്ങുകയായിരുന്നുവെന്നും അദ്ദേഹം മത്സരരംഗത്ത് നിന്ന് മാറിനിൽക്കണമായിരുന്നുവെന്നും എൻസിപി ബ്ലോക്ക് കമ്മിറ്റി സെക്രട്ടറി അരവിന്ദൻ മീഡിയവണിനോട് പ്രതികരിച്ചു. തിരഞ്ഞെടുപ്പിന് മുൻപ് തന്നെ ശശീന്ദ്രന്റെ സ്ഥാനാർത്ഥിത്വത്തിനെതിരെ പ്രാദേശിക തലത്തിൽ വലിയ പ്രതിഷേധം നിലനിന്നിരുന്നു. എൻസിപി ജില്ലാ നേതാക്കൾ പോലും ഇതിനെതിരെ പരസ്യമായി രംഗത്തുവരികയും ചെയ്തിരുന്നു. എന്നാൽ ഈ എതിർപ്പുകളെല്ലാം അവഗണിച്ചു കൊണ്ട് അദ്ദേഹം മത്സരരംഗത്ത് തുടർന്നതാണ് മണ്ഡലത്തിലെ പരാജയത്തിന് അടിസ്ഥാന കാരണമായതെന്നാണ് പാർട്ടിക്കുള്ളിലെ പൊതുവായ വിലയിരുത്തൽ. മറ്റാര് മത്സരിച്ചിരുന്നെങ്കിലും എലത്തൂരിലെ വിജയം നിലനിർത്താൻ എൽഡിഎഫിന് സാധിക്കുമായിരുന്നുവെന്ന് ബ്ലോക്ക് കമ്മിറ്റി ആവർത്തിച്ചു.
ശശീന്ദ്രന്റെ സ്ഥാനാർത്ഥിത്വത്തിനെതിരെ എൻസിപിയുടെ യുവജന വിഭാഗമായ എൻവൈസിയും കടുത്ത നിലപാടുമായി മുന്നോട്ടുവന്നിട്ടുണ്ട്. തലമുറ മാറ്റം ആഗ്രഹിച്ച മണ്ഡലത്തിൽ പഴയ നേതാക്കൾ തന്നെ കടിച്ചുതൂങ്ങുന്നത് തിരിച്ചടിയാകുമെന്ന് നേരത്തെ തന്നെ മുന്നറിയിപ്പ് നൽകിയിരുന്നതായി അവർ ചൂണ്ടിക്കാട്ടി. അതേസമയം കോഴിക്കോട് നോർത്ത്, സൗത്ത് മണ്ഡലങ്ങളിലെ വോട്ട് ചോർച്ചയെക്കുറിച്ചുള്ള ഗുരുതരമായ ആരോപണവുമായി ഐഎൻഎൽ സംസ്ഥാന പ്രസിഡന്റ് അഹമ്മദ് ദേവർകോവിൽ രംഗത്തെത്തിയത് മുന്നണിയെ കൂടുതൽ പ്രതിരോധത്തിലാക്കിയിട്ടുണ്ട്.
മണ്ഡലങ്ങളിൽ എൽഡിഎഫിന്റെ വോട്ടുകൾ വലിയ തോതിൽ ബിജെപിക്ക് പോയതായി അദ്ദേഹം ആരോപിച്ചു. എണ്ണായിരത്തോളം വോട്ടുകളുടെ കുറവ് സംഭവിച്ചത് നിസ്സാരമായി കാണാനാവില്ലെന്നും ഇക്കാര്യം ഗൗരവമായി പരിശോധിക്കണമെന്നും അഹമ്മദ് ദേവർകോവിൽ ആവശ്യപ്പെട്ടു. സമാനമായ ആശങ്ക നേരത്തെ തോട്ടത്തിൽ രവീന്ദ്രനും പങ്കുവെച്ചിരുന്നു. മുതിർന്ന നേതാക്കൾക്കെതിരെയുള്ള അതൃപ്തിയും വോട്ട് കച്ചവട ആരോപണങ്ങളും വരും ദിവസങ്ങളിൽ എൽഡിഎഫിനുള്ളിൽ വലിയ രാഷ്ട്രീയ ചർച്ചകൾക്കും പൊട്ടിത്തെറികൾക്കും വഴിവെക്കുമെന്ന് ഉറപ്പാണ്. മതേതര വോട്ടുകളിൽ വിള്ളലുണ്ടായെന്ന ആരോപണം മുന്നണിയുടെ അടിത്തറയെ തന്നെ ബാധിക്കുന്ന ഒന്നായതിനാൽ അടിയന്തരമായ തിരുത്തൽ നടപടികൾക്കായി ഘടകകക്ഷികൾ സമ്മർദ്ദം ചെലുത്തുകയാണ്.
