കൻസാസ് സിറ്റി: ലോകകപ്പ് കിരീടം നിലനിർത്താൻ അർജന്റീന സെമി ഫൈനൽ ടിക്കറ്റ് ലക്ഷ്യമിട്ട് നാളെ വീണ്ടുമിറങ്ങുന്നു. സെമി ഫൈനൽ ടിക്കറ്റ് ലക്ഷ്യമിട്ട് ലയണൽ മെസിയും സംഘവും നാളെ ക്വാർട്ടർ ഫൈനലിൽ സ്വിറ്റ്സർലൻഡിനെ നേരിടും. കൻസാസ് സിറ്റി സ്റ്റേഡിയത്തിൽ ഇന്ത്യൻ സമയം നാളെ രാവിലെ 6.30നാണ് മത്സരം.
പ്രീക്വാർട്ടറിൽ കടുത്ത പോരാട്ടത്തിനൊടുവിലാണ് അർജന്റീന ക്വാർട്ടറിൽ എത്തിയത്. എന്നാൽ വ്യത്യസ്തമായ ശൈലിയുമായി എത്തുന്ന സ്വിറ്റ്സർലൻഡിനെതിരെ അർജന്റീനയ്ക്ക് കാര്യങ്ങൾ എളുപ്പമാകില്ലെന്നാണ് വിലയിരുത്തൽ.
ലോക ചാമ്പ്യന്മാരായ അർജന്റീനയുടെ പ്രധാന പ്രതീക്ഷ വീണ്ടും ലയണൽ മെസിയിലാണ്. കഴിഞ്ഞ മത്സരങ്ങളിൽ മികച്ച ഫോമിലുള്ള മെസി മുന്നേറ്റത്തിന് നേതൃത്വം നൽകുന്നത് ടീമിന്റെ ആത്മവിശ്വാസം വർധിപ്പിച്ചിട്ടുണ്ട്. കാബോ വെർദെയെയും ഈജിപ്തിനെയും മറികടന്ന അർജന്റീനയുടെ മുന്നേറ്റത്തിൽ മെസിയുടെ പ്രകടനം നിർണായകമായിരുന്നു.
മെസിയെ നിയന്ത്രിക്കുക എന്നത് സ്വിസ് പ്രതിരോധത്തിന് വലിയ വെല്ലുവിളിയാകും. ഇരുടീമുകളും ഏറ്റുമുട്ടിയ ഏഴ് മത്സരങ്ങളിലും സ്വിറ്റ്സർലൻഡിന് അർജന്റീനയെ തോൽപ്പിക്കാനായിട്ടില്ലെന്ന ചരിത്രവും അർജന്റീനയ്ക്ക് ആത്മവിശ്വാസം നൽകുന്നു.
അതേസമയം, അർജന്റീനയുടെ ആക്രമണങ്ങളെ പ്രതിരോധിക്കുക എന്നിവയ്ക്കാകും സ്വിറ്റ്സർലൻഡ് മുൻഗണന നൽകുക. വേഗമേറിയ പ്രത്യാക്രമണങ്ങളിലൂടെ അർജന്റീനയെ ഞെട്ടിക്കാനാണ് സ്വിസ് ടീമിന്റെ നീക്കം.
കഴിഞ്ഞ മത്സരങ്ങളിൽ അർജന്റീനയുടെ പ്രതിരോധത്തിലെ ചില ദൗർബല്യങ്ങൾ എതിരാളികൾ തുറന്നുകാട്ടിയിരുന്നു. ഈ അവസരങ്ങൾ മുതലെടുക്കാനാകും സ്വിറ്റ്സർലൻഡ് ശ്രമിക്കുക. പരിക്കിലായിരുന്ന പ്ലേമേക്കർ യോഹാൻ മൻസംബി ഫിറ്റ്നസ് വീണ്ടെടുത്ത് തിരിച്ചെത്തുന്നത് സ്വിസ് ടീമിന് നിർണായകമാണ്.
മെസിയുടെ മികവിൽ അർജന്റീനയുടെ കുതിപ്പ് തുടരുമോ, അതോ സ്വിറ്റ്സർലൻഡ് ചരിത്രം തിരുത്തുമോ എന്നറിയാൻ ആരാധകർ കാത്തിരിക്കുകയാണ്.
