പത്തനംതിട്ട: ചെങ്ങന്നൂരിൽ ട്രെയിൻ യാത്രയ്ക്കിടെ കാണാതായ മധ്യവയസ്കന്റെ മൃതദേഹം റെയിൽവേ ട്രാക്കിന് സമീപത്ത് കണ്ടെത്തി. പുലിയൂർ തിങ്കളാമുറ്റം തോട്ടിയാട്ട് മേലത്തേതിൽ സ്വദേശി ബിനു ഫിലിപ്പ് (മനു-52)യുടെ മൃതദേഹമാണ് കാഞ്ഞിരമറ്റത്തിന് സമീപം കണ്ടെത്തിയത്.

വെള്ളിയാഴ്ച പുലർച്ചെ റെയിൽവേ ജീവനക്കാർ പാളം പരിശോധന നടത്തുന്നതിനിടെയാണ് മൃതദേഹം കണ്ടെത്തിയത്. ബുധനാഴ്ച രാത്രി രാജധാനി എക്സ്പ്രസ്സിൽ ചെങ്ങന്നൂരിൽ നിന്ന് എറണാകുളം വരെ യാത്ര ചെയ്യുന്നതിനിടെ ഇയാൾ കാണാതായതായി റിപ്പോർട്ട് ചെയ്തിരുന്നു.

ചങ്ങനാശ്ശേരി സ്റ്റേഷൻ കഴിഞ്ഞ് ഉറങ്ങാൻ കിടന്ന ബിനു ഫിലിപ്പ് പിന്നീട് എവിടെയാണ് കാണാതായതെന്നത് വ്യക്തമല്ല. ട്രെയിൻ കോട്ടയം, ഏറ്റുമാനൂർ, കുറുപ്പന്തറ സ്റ്റേഷനുകളിൽ നിർത്തിയിരുന്നു.

ഇദ്ദേഹത്തിന്റെ മൊബൈൽ ഫോൺ സീറ്റിൽ നിന്നും കണ്ടെത്തിയിരുന്നു.