ഓക്‌ലൻഡ്: ന്യൂസിലൻഡിനെതിരായ ഏകദിന പരമ്പരയ്ക്കുള്ള തയ്യാറെടുപ്പുകൾക്കിടെ ഇന്ത്യൻ ക്യാപ്റ്റൻ ശുഭ്മാൻ ഗിൽ ഉപയോഗിച്ച പുതിയ ഫിറ്റ്നസ് ഉപകരണം കായികലോകത്ത് ശ്രദ്ധ നേടുന്നു. ഓക്‌ലൻഡിലെ പരിശീലനത്തിനിടെ ഗില്ലിന്റെ നെറ്റിയിൽ കണ്ട ‘ടെംപിൾ’ (Temple) എന്ന ഉപകരണമാണ് ചർച്ചയാകുന്നത്. തലച്ചോറുമായി ബന്ധപ്പെട്ട ചില ശാരീരിക സിഗ്നലുകൾ നിരീക്ഷിക്കാൻ രൂപകൽപ്പന ചെയ്ത ഈ ഉപകരണം പരമ്പരാഗത ഫിറ്റ്നസ് ട്രാക്കറുകളിൽനിന്ന് വ്യത്യസ്തമാണ്.
ഇന്ത്യൻ ബാഡ്മിന്റൺ താരം പി.വി. സിന്ധുവും നേരത്തെ ഈ ഉപകരണം ഉപയോഗിച്ചതായി റിപ്പോർട്ടുകളുണ്ടായിരുന്നു. എന്നാൽ താൻ ഉപകരണം ഉപയോഗിക്കുന്നതിന്റെ കാരണം ഗിൽ ഇതുവരെ പരസ്യമായി വ്യക്തമാക്കിയിട്ടില്ല. രണ്ട് പ്രമുഖ ഇന്ത്യൻ കായികതാരങ്ങൾ പുതിയ സാങ്കേതികവിദ്യയിലേക്ക് തിരിയുന്നത് കായികപ്രേമികൾക്കിടയിൽ കൗതുകമുണ്ടാക്കിയിട്ടുണ്ട്.
തലച്ചോറുമായി ബന്ധപ്പെട്ട സിഗ്നലുകൾ നിരീക്ഷിക്കാൻ
സൊമാറ്റോ സഹസ്ഥാപകൻ ദീപീന്ദർ ഗോയലുമായി ബന്ധപ്പെട്ട സംഘം വികസിപ്പിച്ചെടുത്ത ഉപകരണമാണ് ടെംപിൾ. നെറ്റിയുടെ ഇരുവശങ്ങളിലായി ധരിക്കുന്ന ഈ ഉപകരണം സെറിബ്രൽ രക്തയോട്ടത്തിലുണ്ടാകുന്ന മാറ്റങ്ങളും തലച്ചോറിന്റെ പ്രവർത്തനവുമായി ബന്ധപ്പെട്ട ചില ശാരീരിക സിഗ്നലുകളും നിരീക്ഷിക്കാനാണ് ലക്ഷ്യമിടുന്നത്.
ഹൃദയമിടിപ്പ്, ഉറക്കം, ശാരീരിക പ്രവർത്തനങ്ങൾ എന്നിവ നിരീക്ഷിക്കുന്ന സ്മാർട്ട് വാച്ചുകളിൽനിന്ന് വ്യത്യസ്തമായി, സമ്മർദവുമായി ബന്ധപ്പെട്ട ശാരീരിക പ്രതികരണങ്ങളെക്കുറിച്ചുള്ള വിവരങ്ങൾ ശേഖരിക്കാനാണ് ഈ സാങ്കേതികവിദ്യ ശ്രമിക്കുന്നത്.
കായിക പ്രകടനത്തിൽ എത്രത്തോളം സഹായിക്കും?
ഒപ്റ്റിക്കൽ സെൻസറുകൾ ഉപയോഗിച്ച് തലച്ചോറിലേക്കുള്ള രക്തയോട്ടത്തിലെ മാറ്റങ്ങൾ നിരീക്ഷിക്കുന്നതാണ് ഉപകരണത്തിന്റെ പ്രധാന സവിശേഷത. പരിശീലനത്തിനിടയിലെ സമ്മർദവും ശരീരത്തിന്റെ പ്രതികരണങ്ങളും മനസ്സിലാക്കാൻ ഇത്തരം വിവരങ്ങൾ സഹായകമാകുമെന്നാണ് പ്രതീക്ഷ.
എന്നാൽ ടെംപിൾ ഒരു മെഡിക്കൽ ഉപകരണമല്ലെന്നും വെൽനെസ്, ഗവേഷണ ആവശ്യങ്ങൾക്കായാണ് രൂപകൽപ്പന ചെയ്തിരിക്കുന്നതെന്നും റിപ്പോർട്ടുകൾ വ്യക്തമാക്കുന്നു. കായിക പ്രകടനം മെച്ചപ്പെടുത്തുന്നതിൽ ഉപകരണത്തിന്റെ ഫലപ്രാപ്തി പൂർണമായി തെളിയിക്കപ്പെട്ടിട്ടില്ല.
ഗിൽ ഈ ഉപകരണം സ്ഥിരമായി ഉപയോഗിക്കുന്നുണ്ടോ, പരിശീലനത്തിലും മത്സരങ്ങളിലും ഇതിലൂടെ ലഭിക്കുന്ന വിവരങ്ങൾ പ്രയോജനപ്പെടുത്തുന്നുണ്ടോ തുടങ്ങിയ കാര്യങ്ങളിൽ കൂടുതൽ വ്യക്തത വരാനുണ്ട്. ക്രിക്കറ്റിൽ ഫിറ്റ്നസിനും മാനസിക തയ്യാറെടുപ്പിനും പ്രാധാന്യം വർധിക്കുന്നതിനിടെയാണ് പുതിയ സാങ്കേതികവിദ്യയും ശ്രദ്ധ നേടുന്നത്.
