മലപ്പുറം: ഭക്ഷണം പാകം ചെയ്യാൻ ഒരിക്കൽ ഉപയോഗിച്ച എണ്ണ വീണ്ടും വീണ്ടും ചൂടാക്കി ഉപയോഗിക്കുന്ന സ്ഥാപനങ്ങൾക്കെതിരെ ഭക്ഷ്യസുരക്ഷാ വകുപ്പിന്റെ പരിശോധന ശക്തമാക്കി. ‘ഓപ്പറേഷൻ തെളിമ’യുടെ ഭാഗമായി ജില്ലയിൽ നടത്തിയ രാത്രികാല പരിശോധനയിൽ ഉപയോഗിക്കാൻ പാടില്ലാത്ത 291.5 ലിറ്റർ ഭക്ഷ്യഎണ്ണ കണ്ടെത്തി നശിപ്പിച്ചു. ജില്ലയിലെ വിവിധ ഭാഗങ്ങളിലുള്ള ഹോട്ടലുകൾ, റെസ്റ്റോറന്റുകൾ, ബേക്കറികൾ, ഭക്ഷണശാലകൾ എന്നിവിടങ്ങളിലായി 141 സ്ഥാപനങ്ങളിലാണ് പരിശോധന നടത്തിയത്. ആറ് സ്ക്വാഡുകളായി തിരിഞ്ഞായിരുന്നു പരിശോധന. തുടർച്ചയായി ചൂടാക്കി ഉപയോഗിച്ചതിനെ തുടർന്ന് ഗുണനിലവാരം നഷ്ടപ്പെട്ട എണ്ണയാണ് പ്രധാനമായും കണ്ടെത്തിയത്. […]