പാലക്കാട് : മെഡിക്കൽ കോളേജിൽ മലമ്പുഴപദ്ധതിയിൽനിന്നുള്ള വെള്ളം മുടങ്ങിയിട്ട് മാസങ്ങൾ. മലമ്പുഴവെള്ളം ടാങ്കിൽ സംഭരിക്കുന്നുണ്ടെങ്കിലും മോട്ടോർ തകരാറിലായതിനാൽ മെഡിക്കൽകോളേജിന്റെ വിവിധ ഭാഗങ്ങളിലേക്ക് വെള്ളമെത്തിക്കാൻ സാധിക്കുന്നില്ല. മോട്ടോർ കത്തിപ്പോവുകയായിരുന്നു. നിലവിൽ കുഴൽക്കിണർ വെള്ളമാണ് ഉപയോഗിക്കുന്നത്. മോട്ടോർ കേടുപാട്‌ തീർക്കുന്നതിനായി നൽകിയിട്ടുണ്ടെങ്കിലും തിരികെ ലഭിച്ചിട്ടില്ല. പണം നൽകുന്നതിലെ കാലതാമസമാണ് മോട്ടോർ തിരികെലഭിക്കുന്നതിന് തടസ്സമെന്നാണ് സൂചന. തുക നൽകുന്നതിനുള്ള കത്തിടപാടുകൾ പുരോഗതിയിലാണ്. മെഡിക്കൽകോളേജിന്റെ പരിസരത്ത് കടകൾ കുറവായതിനാൽ ഇവിടെയെത്തുന്നവർക്ക് കുടിവെള്ളം വാങ്ങാനും ബുദ്ധിമുട്ടാണ്.