ഹെെദരാബാദ്: ജമ്മുകശ്മീരിലെ പഹൽ​ഗാം ഭീകരാക്രമണത്തിലെ ഇരകൾക്ക് ആദരം അർപ്പിക്കാൻ ഇന്ത്യൻ പ്രീമിയർ ലീ​ഗ്. സൺറൈസേഴ്സ് ഹൈദരാബാദും മുംബൈ ഇന്ത്യൻസും തമ്മിൽ ഇന്ന് ഹൈദരാബാദിലെ രാജീവ് ഗാന്ധി അന്താരാഷ്ട്ര സ്റ്റേഡിയത്തിൽ നടക്കുന്ന മത്സരത്തിലാണ് ആദരവ് അർപ്പിക്കുക. മത്സരം ആരംഭിക്കുന്നതിന് മുമ്പ് ഒരു മിനിറ്റ് മൗനം ആചരിക്കും. ഇരുടീമിലെയും താരങ്ങൾ, അംപയർമാർ, മാച്ച് ഒഫീഷ്യൽസ് എന്നിവർ ഇന്നത്തെ മത്സരത്തിൽ കറുത്ത ആംബാൻഡ് ധരിക്കും. ഒപ്പം ഇന്നത്തെ മത്സരത്തിൽ ചിയർലീഡർമാരുടെ നൃത്തവും മറ്റ് ഫയർവർക്കുകളും ഉണ്ടാകില്ല.