പരിചയമില്ലാത്ത ഗ്രൂപ്പുകളിലേക്ക് ഉപയോക്താക്കളെ ചേർക്കുന്നത് തടയാൻ പുതിയ ഫീച്ചർ അവതരിപ്പിച്ച് വാട്സ്ആപ്പ്. ഡിജിറ്റൽ തട്ടിപ്പുകൾ തടയുന്നതിനായാണ് കമ്പനി ‘സേഫ്റ്റി ഓവര്വ്യൂ’ ഫീച്ചർ അവതരിപ്പിക്കുന്നത്. കോൺടാക്റ്റ് ലിസ്റ്റിലില്ലാത്തവർ സംശയാസ്പദമായി ഏതെങ്കിലും ഗ്രൂപ്പുകളിൽ ഉപയോക്താക്കളെ ചേർത്താൽ ‘സേഫ്റ്റി ഓവര്വ്യൂ’ സ്ക്രീനിൽ പ്രത്യക്ഷപ്പെടും.
ഈ ഫീച്ചറിലൂടെ ആരാണ് ഗ്രൂപ്പിൽ ആഡ് ആക്കിയത് ,ക്രീയേറ്റ് ചെയ്തത് ആരാണ്, എത്ര അംഗങ്ങളുണ്ട്, തീയതി തുടങ്ങിയ എല്ലാ വിവരങ്ങളും അറിയാൻ സാധിക്കും. ഈ വിവരങ്ങളെല്ലാം മനസിലാക്കിയ ശേഷം ഉപയോക്താവിന് ഗ്രൂപ്പിൽ തുടരണോ വേണ്ടയോ എന്ന് തീരുമാനിക്കാം. കൂടുതൽ വിശദാംശങ്ങൾക്കായി ചാറ്റുകൾ പരിശോധിക്കുകയും ചെയ്യാം.
ഇനി ഗ്രൂപ്പിൽ തുടരാൻ താത്പര്യമില്ലെങ്കിൽ ചാറ്റിലെ സന്ദേശങ്ങളൊന്നും നോക്കാതെ തന്നെ ഗ്രൂപ്പിൽ നിന്ന് എക്സിറ്റ് ആകാനും സാധിക്കും. ഇന്ത്യയിൽ പുതിയ ഫീച്ചർ ഈ ആഴ്ച്ചയോടെ എത്തുമെന്നാണ് കമ്പനി അറിയിച്ചിരിക്കുന്നത്. ഉപയോക്താക്കളെ തട്ടിപ്പുകളിൽ നിന്ന് ഒഴിവാക്കുകയാണ് പുതിയ ഫീച്ചറിന്റെ ലക്ഷ്യം.
