മുംബൈ: ലോകത്തിലെ തന്നെ ഏറ്റവും വലിയ സാമ്പത്തിക വിപണികളിലൊന്നായ ഇന്ത്യൻ വിവാഹ മേഖല ഇപ്പോൾ അതിവേഗ വിതരണ ശൃംഖലകളുടെ (ക്വിക്ക് കൊമേഴ്‌സ്) പിടിയിലാണ്. സ്വർണ്ണാഭരണങ്ങൾ, വസ്ത്രങ്ങൾ, പന്തൽ അലങ്കാരങ്ങൾ, സദ്യ എന്നിങ്ങനെ കോടികൾ ഒഴുകുന്ന കല്യാണ ആഘോഷങ്ങൾക്കിടയിൽ അവസാന നിമിഷം സാധനങ്ങൾ വാങ്ങാൻ മറന്നുപോകുന്ന പതിവ് രീതിയെയാണ് ഈ ആപ്പുകൾ ഇപ്പോൾ ബിസിനസ്സ് അവസരമാക്കി മാറ്റുന്നത്. ആഡംബര പൂർണ്ണമായ ഇന്ത്യൻ വിവാഹങ്ങൾ പുതിയൊരു ‘ക്വിക്ക്-കൊമേഴ്‌സ്’ വിപ്ലവത്തിന് സാക്ഷ്യം വഹിക്കുമ്പോൾ ബ്ലിങ്കിറ്റ്, സെപ്റ്റോ, സ്വിഗ്ഗി ഇൻസ്റ്റാമാർട്ട് തുടങ്ങിയ പ്ലാറ്റ്‌ഫോമുകൾ വിവാഹ സീസൺ മുൻനിർത്തി പ്രത്യേക വിഭാഗങ്ങൾ തന്നെ ആരംഭിച്ചു കഴിഞ്ഞു. അവസാന നിമിഷം ആവശ്യമായി വരുന്ന ലഡുവും പൂജാ സാധനങ്ങളും മുതൽ അത്യന്തം വിലപിടിപ്പുള്ള ലഹംഗയും ആഭരണങ്ങളും വരെ വെറും 10 മുതൽ 20 മിനിറ്റിനുള്ളിൽ വീട്ടുപടിക്കലോ നേരിട്ട് കല്യാണപ്പന്തലിലോ എത്തിക്കുന്ന രീതിയിലേക്ക് വിപണി മാറിക്കഴിഞ്ഞു. തിരക്കേറിയ ചടങ്ങുകൾക്കിടയിൽ സാധനങ്ങൾ വാങ്ങാൻ പുറത്തുപോകുന്നതിലെ ബുദ്ധിമുട്ടും സമയനഷ്ടവും ഒഴിവാക്കാൻ വധൂവരന്മാരും ബന്ധുക്കളും ഇപ്പോൾ ഈ ഡിജിറ്റൽ സേവനങ്ങളെയാണ് പ്രധാനമായും ആശ്രയിക്കുന്നത്.

വിവാഹ ചടങ്ങുകൾക്കിടയിൽ പെട്ടെന്ന് ഒരു പാർട്ടിയിലേക്ക് ക്ഷണം ലഭിക്കുകയോ അല്ലെങ്കിൽ വസ്ത്രത്തിന് അനുയോജ്യമായ ആഭരണങ്ങൾ കയ്യിലില്ലെന്ന് തിരിക്കുകയോ ചെയ്താൽ പോലും പരിഭ്രാന്തരാകേണ്ടതില്ലാത്ത സാഹചര്യം ഈ ആപ്പുകൾ ഒരുക്കുന്നുണ്ട്. ലളിതമായ ആഭരണങ്ങൾ മുതൽ വധൂവരന്മാർക്ക് നൽകാനുള്ള വൈവിധ്യമാർന്ന സമ്മാനങ്ങൾ വരെ നിമിഷനേരം കൊണ്ട് നിങ്ങളുടെ കൈകളിലെത്തും. സമ്മാനങ്ങൾ വാങ്ങാൻ മറന്നുപോകുന്നവർക്കായി മനോഹരമായ ബൊക്കെകൾ, ആകർഷകമായ ഗിഫ്റ്റ് റാപ്പുകൾ, ചോക്കലേറ്റുകൾ തുടങ്ങി നിങ്ങൾ മനസിൽ ഉദ്ദേശിക്കുന്ന എന്തും ഈ ആപ്പുകൾ വഴി ഓർഡർ ചെയ്യാം. സാധാരണയായി മാർക്കറ്റുകളിലെ തിരക്കും നഗരങ്ങളിലെ ട്രാഫിക് കുരുക്കും കാരണം മണിക്കൂറുകൾ നഷ്ടപ്പെടുമെന്നതിനാൽ, ചെറിയ സാധനങ്ങൾക്കായി പോലും ഒരാളെ പുറത്തേക്ക് അയക്കുന്നതിലും ലാഭം ഇത്തരം ക്വിക്ക് കൊമേഴ്‌സ് ആപ്പുകൾ വഴി ഓർഡർ ചെയ്യുന്നതാണെന്ന് കുടുംബങ്ങൾ തിരിച്ചറിയുന്നു. പത്തുപേർ ഓർഡർ ചെയ്യുന്ന സാധനം മിനിറ്റുകൾക്കുള്ളിൽ വിതരണം ചെയ്യാനുള്ള സാങ്കേതിക തികവും ഇത്തരം കമ്പനികൾക്കുണ്ട്.

ഇന്ത്യൻ വിവാഹങ്ങൾ പലപ്പോഴും വലിയ തിരക്കുകളും ഒപ്പം മാനസിക സമ്മർദ്ദങ്ങളും നിറഞ്ഞതാണ്. ആസൂത്രണത്തിൽ എത്ര മികവ് പുലർത്തിയാലും അവസാന നിമിഷം ഉണ്ടാകുന്ന പരിഭ്രാന്തിയും ആശയക്കുഴപ്പങ്ങളും സ്വാഭാവികമാണ്. ഈ ഘട്ടത്തിൽ രക്ഷകരായി എത്തുന്നത് അതിവേഗ ഡെലിവറി പ്ലാറ്റ്‌ഫോമുകളാണ്. വിവാഹ ചടങ്ങുകൾ നിശ്ചിത മുഹൂർത്തത്തിൽ തന്നെ നടക്കേണ്ടതുള്ളതുകൊണ്ട് സമയം ലാഭിക്കുക എന്നത് കുടുംബങ്ങളെ സംബന്ധിച്ച് ഏറ്റവും പ്രധാനപ്പെട്ട കാര്യമാണ്. ലഹംഗകൾ പോലുള്ള വസ്ത്രങ്ങൾ പോലും ട്രയൽ നോക്കി വാങ്ങാനുള്ള സൗകര്യം ചില ആപ്പുകൾ പരീക്ഷണാടിസ്ഥാനത്തിൽ കൊണ്ടുവരുന്നുണ്ട്. ക്വിക്ക് കൊമേഴ്‌സ് വിപണിയിൽ സംഭവിച്ചുകൊണ്ടിരിക്കുന്ന ഈ മാറ്റം പരമ്പരാഗത ഷോപ്പിംഗ് രീതികളെ വലിയ രീതിയിൽ സ്വാധീനിക്കുന്നുണ്ട്. ചുരുക്കത്തിൽ, കല്യാണ വീടുകളിലെ ഓട്ടപ്പാച്ചിലുകൾ കുറയ്ക്കാനും ആഘോഷങ്ങൾ കൂടുതൽ ആസ്വാദ്യകരമാക്കാനും ഈ പുതിയ ഡിജിറ്റൽ വിപ്ലവം സഹായിക്കുന്നു എന്നാണ് വിപണി വിദഗ്ധർ വിലയിരുത്തുന്നത്.