തിരുവനന്തപുരം: എഡിജിപി എം.ആര്.അജിത് കുമാറിനെ വീണ്ടും തന്ത്രപ്രധാന പദവിയിലേക്ക് നിയോഗിച്ച് സര്ക്കാര്. ബറ്റാലിയന് എഡിജിപിയായിരുന്ന അജിത് കുമാറിന് എക്സൈസ് കമ്മിഷണറായാണ് സ്ഥാനക്കയറ്റം നല്കിയിരിക്കുന്നത്. വിജിലന്സ് ആന്ഡ് ആന്റി കറപ്ഷന് ബ്യൂറോ ഡയറക്ടര് യോഗേഷ് ഗുപ്തയെ ഫയര് ആന്ഡ് റെസ്ക്യൂ ഡയറക്ടര് ജനറലായാണ് നിയോഗിച്ചിരിക്കുന്നത്.
ഫയര് ആന്ഡ് റെസ്ക്യൂ ഡയറക്ടറായിരുന്ന മനോജ് ഏബ്രഹാം വിജിലന്സ് ഡയറക്ടറാകും. ജയില് ഡിജിപി ആയിരുന്ന ബല്റാം കുമാര് ഉപാധ്യയയെ കേരള പൊലീസ് അക്കാദമി ഡയറക്ടറായും എക്സൈസ് കമ്മിഷണറായിരുന്ന മഹിപാല് യാദവിനെ ക്രൈം എഡിജിപി ആയും നിയമിച്ചു.
അനധികൃത സ്വത്ത് സമ്പാദനം, ആര്എസ്എസ് നേതാക്കളുമായുള്ള കൂടിക്കാഴ്ച, തൃശൂര് പൂരം കലക്കല് തുടങ്ങി ഒട്ടേറെ വിവാദങ്ങളില് ഇടംപിടിച്ച് നടപടി നേരിട്ട എം.ആര്.അജിത് കുമാര് 1995 ബാച്ച് ഉദ്യോഗസ്ഥനാണ്. 2028 വരെയാണ് ഇദ്ദേഹത്തിന് സര്വീസ് ഉള്ളത്. ഡിജിപി എസ്. ദര്വേഷ് സാഹിബ് ജൂണ് 30ന് വിരമിക്കുമ്പോള് സംസ്ഥാനത്തിന്റെ പുതിയ പൊലീസ് മേധാവിയാകാനുള്ളവരുടെ സാധ്യതപ്പട്ടികയിലും അജിത് കുമാറിന്റെ പേരുണ്ട്.
