ന്യൂഡൽഹി : ഓപ്പറേഷൻ സിന്ദൂറിന് ശേഷമുള്ള ആദ്യ മന്ത്രിസഭാ യോഗം ഇന്ന് പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേരുമെന്ന് റിപ്പോർട്ടുകൾ. ഇന്ന് വൈകുന്നേരം 5 മണിയോടെ സുഷമ സ്വരാജ് ഭവനിലാകും യോഗം ചേരുക .മോദി സർക്കാർ 11 വർഷം ഭരിക്കുകയും മോദി 3.0 സർക്കാരിന്റെ ഒരു വർഷം പൂർത്തീകരിക്കുകയും ചെയ്യുന്ന സാഹചര്യത്തിലാണ് ഈ യോഗം. ഓപ്പറേഷൻ സിന്ദൂരിന്റെ വിജയത്തെക്കുറിച്ച് എല്ലാ മന്ത്രിമാരെയും ഈ സെഷനിൽ വിശദമായി അറിയിക്കുമെന്ന് വൃത്തങ്ങൾ അറിയിച്ചു.

കഴിഞ്ഞ 11 വർഷത്തെ മോദി സർക്കാരിന്റെ നേട്ടങ്ങളെക്കുറിച്ചുള്ള ചർച്ചകളും അജണ്ടയിൽ ഉൾപ്പെടുന്നു. കൂടാതെ ഈ നേട്ടങ്ങൾ സോഷ്യൽ മീഡിയയിലൂടെയും പത്ര ലേഖനങ്ങളിലൂടെയും പ്രചരിപ്പിക്കാൻ കാബിനറ്റ് മന്ത്രിമാരോടും ആവശ്യപ്പെട്ടിട്ടുണ്ടെന്നാണ് റിപ്പോർട്ട്.എല്ലാ മന്ത്രാലയങ്ങളും അവരുടെ നേട്ടങ്ങൾ സമാഹരിച്ച് വാർത്താ വിതരണ പ്രക്ഷേപണ മന്ത്രാലയവുമായി പങ്കിടാൻ പ്രധാനമന്ത്രി മോദി നിർദ്ദേശിച്ചതായും റിപ്പോർട്ടുകൾ പുറത്ത് വരുന്നുണ്ട്.