ന്യൂഡല്ഹി: ജൂണ് 2025 കൗണ്സില് ഓഫ് സയന്റിഫിക് ആന്ഡ് ഇന്ഡസ്ട്രിയല് റിസര്ച്ച് (csir)- യുജിസി നെറ്റ് പരീക്ഷയുടെ രജിസ്ട്രേഷന് ആരംഭിച്ചു. നാഷണല് ടെസ്റ്റിങ് ഏജന്സി വിജ്ഞാപന പ്രകാരം ജൂണ് വരെ അപേക്ഷ നൽകാം. ഔദ്യോഗിക വെബ്സൈറ്റായ csirnet.nta.ac.in വഴിയാണ് അപേക്ഷ സമർപ്പിക്കേണ്ടത്.
പരീക്ഷ ജൂലൈ 26 മുതല് ജൂലൈ 28 വരെ നടക്കും. ആപ്ലിക്കേഷന് ഫീസ് അടയ്ക്കാനുള്ള അവസാന തീയതി ജൂണ് 24ന് രാത്രി 11.59 വരെയാണ്. അപേക്ഷയില് തിരുത്തല് വരുത്താൻ ജൂണ് 25 , 26 തീയതികളിൽ അവസരമുണ്ടാകും. പരീക്ഷയ്ക്ക് യോഗ്യത നേടുന്നതിന്, ഉദ്യോഗാര്ത്ഥികള് ഔദ്യോഗിക വിജ്ഞാപനത്തില് പറഞ്ഞിരിക്കുന്ന മാനദണ്ഡങ്ങള് പാലിക്കണം. അക്കാദമിക യോഗ്യതകളുടെ കാര്യത്തില്, ഉദ്യോഗാര്ത്ഥികള് വിജ്ഞാപനത്തില് വ്യക്തമാക്കിയിട്ടുള്ള യോഗ്യതകള് നേടിയിരിക്കണം. കൂടാതെ, ജൂനിയര് റിസര്ച്ച് ഫെലോഷിപ്പ് (JRF), അസിസ്റ്റന്റ് പ്രൊഫസര് തസ്തികകള്ക്ക് അപേക്ഷിക്കുന്ന ഉദ്യോഗാര്ഥികള് നിശ്ചിത പ്രായപരിധിയിലുള്ളവരായിരിക്കണം.
കമ്പ്യൂട്ടര് അധിഷ്ഠിത പരീക്ഷയാണ് (CBT) നാഷണല് ടെസ്റ്റിങ് ഏജന്സി നടത്തുന്നത്. പരീക്ഷ 180 മിനിറ്റ് (3 മണിക്കൂര്) നീണ്ടുനില്ക്കും. ചോദ്യപേപ്പറുകളില് ഒബ്ജക്റ്റീവ് ടൈപ്പ് ചോദ്യങ്ങളായിരിക്കും. കൂടാതെ പേപ്പറുകളുടെ മീഡിയം ഇംഗ്ലീഷിലും ഹിന്ദിയിലും ആയിരിക്കും.
അപേക്ഷ നല്കുന്ന വിധം:
ഔദ്യോഗിക വെബ്സൈറ്റായ csirnet.nta.ac.in സന്ദര്ശിക്കുക. ഹോംപേജില് ‘Joint CSIR-UGC-NET ജൂണ് 2025: രജിസ്റ്റര് ചെയ്യാന്/ലോഗിന് ചെയ്യാന് ഇവിടെ ക്ലിക്ക് ചെയ്യുക’ എന്ന ലിങ്കില് ക്ലിക്ക് ചെയ്യുക. പുതിയ വിന്ഡോയിലേക്ക് നയിക്കും. ഇ-മെയില് ഐഡിയും മൊബൈല് നമ്പറും ഉപയോഗിച്ച് രജിസ്റ്റര് ചെയ്യുക. ആവശ്യമായ വിശദാംശങ്ങള്ക്കൊപ്പം അപേക്ഷാ ഫോം പൂരിപ്പിക്കുക. ആവശ്യമായ രേഖകള് അപ്ലോഡ് ചെയ്ത് അപേക്ഷാ ഫീസ് അടയ്ക്കുക. ഫോം സമര്പ്പിച്ച് സ്ഥിരീകരണ പേജ് ഡൗണ്ലോഡ് ചെയ്യുക. ഭാവി റഫറന്സിനായി ഒരു പകര്പ്പ് സൂക്ഷിക്കുക.
