കൊച്ചി: സ്വകാര്യ പെട്രോള് പമ്പുകളിലെ ശുചിമുറികള് പൊതു ശൗചാലയങ്ങളായി ഉപയോഗിക്കുന്നതിനെതിരെ ഇടക്കാല ഉത്തരവുമായി കേരള ഹൈക്കോടതി. സ്വകാര്യ പെട്രോള് പമ്പ് ഉടമകളുടെ ആവശ്യം അംഗീകരിച്ചാണ് ഹൈക്കോടതിയുടെ തീരുമാനം. ദീര്ഘ, ഹ്രസ്വ ദൂര യാത്രകളില് പെട്രോള് പമ്പുകളിലെ ശുചിമുറികള് ഉപയോഗിക്കുന്ന നിരവധിപ്പേര്ക്ക് ബാധകമാവുന്നതാണ് തീരുമാനം. പെട്രോളിയം ട്രേഡേഴ്സ് ആന്ഡ് ലീഗല് സര്വ്വീസ് സൊസൈറ്റി നല്കിയ റിട്ട് ഹര്ജിയിലാണ് ജസ്റ്റിസ് സി എസ് ഡയസിന്റെ തീരുമാനം. പെട്രോള് പമ്പുകളിലെ ശുചിമുറികള് പൊതു ശൗചാലയങ്ങളാക്കാന് അനുവദിക്കരുതെന്ന് ആവശ്യപ്പെട്ടായിരുന്നു റിട്ട് ഹര്ജി. കേസില് എതിര്സ്ഥാനത്തുള്ളത് കേരള സര്ക്കാരാണ്
പെട്രോള് പമ്പുകളിലെ ശുചിമുറികള് പൊതുജനത്തിന് ഉപയോഗിക്കാന് അനുവദിക്കണമെന്ന് നിര്ബന്ധം പിടിക്കാനാവില്ലെന്ന് തിരുവനന്തപുരം കോര്പ്പറേഷനും സംസ്ഥാന സര്ക്കാരിനോടും ഇടക്കാല ഉത്തരവില് ഹൈക്കോടതി വ്യക്തമാക്കി്. സ്വച്ഛ് ഭാരത് മിഷന് കീഴില് പൊതു ശുചിമുറികള് നിര്മ്മിക്കേണ്ടതിനേക്കുറിച്ച് തിരുവനന്തപുരം മുന്സിപ്പല് കോര്പ്പറേഷന് നിര്ദ്ദേശം നല്കിയത്.
സ്വകാര്യ പമ്പുടമകള് വൃത്തിയാക്കി പരിപാലിക്കുന്ന ശുചിമുറികള് പൊതുശൗചാലയമായി മാറ്റാന് നിര്ബന്ധിക്കുന്ന സാഹചര്യമാണ് നിലവിലുള്ളത്. അവശ്യ സാഹചര്യങ്ങളില് ഉപഭോക്താക്കള്ക്ക് ഉപയോഗിക്കാനായാണ് പെട്രോള് പമ്പുകളില് ശുചിമുറികള് നിര്മ്മിച്ചിട്ടുള്ളതെന്നും പരാതിക്കാര് ഹര്ജിയില് വിശദമാക്കി. തിരുവനന്തപുരം മുന്സിപ്പല് കോര്പ്പറേഷനും മറ്റ് ചില പ്രാദേശിക ഭരണകൂടങ്ങളും പെട്രോള് റിട്ടെയിലര്മാര്ക്ക് പൊതുജനങ്ങള്ക്ക് ശുചിമുറികള് ഉപയോഗിക്കാന് അനുവദിക്കണമെന്ന് നിര്ദ്ദേശം നല്കിയതിന് പിന്നാലെയാണ് ഹര്ജിയെന്നാണ് പരാതിക്കാര് വിശദമാക്കുന്നത്.
.ഇത്തരം നിര്ദ്ദേശം നല്കുന്നത് പെട്രോള് പമ്പുകളിലെ ശുചിമുറികള് പൊതുശൗചാലയങ്ങളാണെന്ന ധാരണ ആളുകള്ക്കിടയില് ഉണ്ടാക്കുമെന്നും പെട്രോള് പമ്പിന്റെ സ്വാഭാവിക രീതിയിലുള്ള പ്രവര്ത്തനം പലപ്പോഴും തടസപ്പെടുത്തുന്ന സാഹചര്യമുണ്ടെന്നും പരാതിക്കാര് ചൂണ്ടിക്കാണിക്കുന്നു. പെട്രോള് പമ്പ് ജീവനക്കാരും ശുചിമുറി ഉപയോഗിക്കുന്നവരും തമ്മില് വാക്കേറ്റമുണ്ടാകുന്ന സാഹചര്യങ്ങളുണ്ടെന്നും പരാതിക്കാര് ചൂണ്ടിക്കാണിക്കുന്നത്. ടൂറിസ്റ്റ് ബസുകളില് അടക്കം എത്തി യാത്രക്കാര്ക്ക് ശുചിമുറി ഉപയോഗിക്കുന്നത് സുരക്ഷയേയും ബാധിക്കുന്നുവെന്നും പരാതിയില് വിശദമാക്കുന്നു. പമ്പുടമകള് പണം ചെലവിട്ട് ഉപഭോക്താക്കളുടെ അത്യാവശ്യത്തിനായാണ് ശുചിമുറികള് നിര്മ്മിച്ച് പരിപാലിക്കുന്നത്. വലിയ രീതിയില് പൊതുജനം ഈ സേവനം ഉപയോഗിക്കാന് ശ്രമിക്കുന്നത് വലിയ ബുദ്ധിമുട്ടാണെന്നും പരാതിക്കാര് വിശദമാക്കി.
ഇന്ധനം നിറയ്ക്കുന്ന വാഹനങ്ങളിലെ ആളുകള്ക്ക് മാത്രമായി പമ്പുകളിലെ ശുചിമുറി ഉപയോഗം നിയന്ത്രിക്കണമെന്നാണ് ഹര്ജിയിലെ പ്രധാന ആവശ്യം. ആദര്ശ് കുമാര്, കെ എം അനീഷ്, ശശാങ്ക് ദേവന്, യദുകൃഷ്ണന് എന്നിവരാണ് പരാതിക്കാര്ക്ക് വേണ്ടി ഹാജരായത്. ഏപ്രില് മാസത്തില് പെട്രോള് പമ്പില് ശുചുമുറിയുടെ താക്കോല് നല്കാത്തതിന് ഉടമക്കെതിരെ ഉപഭോക്തൃ തര്ക്കപരിഹാര കോടതി 165000 രൂപ പിഴ വിധിച്ചിരുന്നു. ഏഴകുളം ഈരകത്ത് ഇല്ലം വീട്ടില് അധ്യാപികയായ സി.എല്. ജയകുമാരിയുടെ പരാതിയിലാണ് നടപടി. കോഴിക്കോട് പയ്യോളിയിലുളള തെനംകാലില് പെട്രോള് പമ്പ് ഉടമ ഫാത്തിമ ഹന്നയ്ക്കെതിരെയാണ് കമ്മീഷന് ഉത്തരവിട്ടത്.
