തിരുവനന്തപുരം: തിരുവനന്തപുരം മെഡിക്കൽ കോളേജ് സൂപ്രണ്ട് ഡോ. ബി. എസ്. സുനിൽകുമാറിനെ സ്ഥാനത്ത് നിന്ന് മാറ്റി. പുതിയ സൂപ്രണ്ടായി ഡോ. സി. ജി. ജയചന്ദ്രനെ നിയമിച്ചു.
സൂപ്രണ്ട് സ്ഥാനത്ത് നിന്ന് ഒഴിവാക്കണമെന്നാവശ്യപ്പെട്ട് ഡോ. സുനിൽകുമാർ നേരത്തെ മെഡിക്കൽ കോളേജ് പ്രിൻസിപ്പാളിന് കത്ത് നൽകിയിരുന്നു. ഗവേഷണ പ്രവർത്തനങ്ങൾക്ക് കൂടുതൽ സമയം കണ്ടെത്തേണ്ടതിന്റെ ആവശ്യകത ചൂണ്ടിക്കാട്ടിയാണ് വിടുതൽ ആവശ്യപ്പെട്ടത്. ഉത്തരവിൽ ഇതേ കാരണമാണ് സ്ഥാനമാറ്റത്തിന് അടിസ്ഥാനം പറഞ്ഞിരിക്കുന്നത്.
സൂപ്രണ്ട് ചുമതലകൾ ജോലിയിൽ ശ്രദ്ധ കേന്ദ്രീകരിക്കാൻ തടസ്സം സൃഷ്ടിക്കുന്നുവെന്നായിരുന്നു ഡോ. സുനിൽകുമാറിന്റെ നിലപാട്. കഴിഞ്ഞ മാസങ്ങളിൽ ഡോ. ഹാരിസിനെ ചുറ്റിപ്പറ്റി കോളേജിൽ ഉയർന്ന വിവാദങ്ങളും, അതിനെ തുടർന്നുണ്ടായ സൂപ്രണ്ടും പ്രിൻസിപ്പാളും ചേർന്ന വാർത്താസമ്മേളനവും, സമ്മേളനത്തിനിടെയുള്ള ഫോൺവിളികളും ഏറെ ചര്ച്ചയായിരുന്നു. ഈ സാഹചര്യത്തിലാണ് സുനിൽകുമാർ സ്ഥാനം ഒഴിയാൻ സന്നദ്ധത അറിയിച്ചത്.
