തൃശ്ശൂർ: പാറേമ്പോട് സംസ്ഥാനപാത നവീകരണ പ്രവർത്തനങ്ങളുടെ ഭാഗമായി സൂക്ഷിച്ചിരുന്ന നിർമാണ സാമഗ്രികൾ മോഷണം പോയതായി പരാതി. പെരുമ്പാവൂർ ആസ്ഥാനമായ ഇ. കെ. കെ. കമ്പനിയുടെ നിയന്ത്രണത്തിലുള്ള 250 ഓളം 12 എംഎം കനവും ഒരു മീറ്റർ നീളവുമുള്ള ഇരുമ്പ് കമ്പികളാണ് മോഷണം പോയത്.
പാതയോരത്ത് കൂട്ടിയിട്ടിരുന്ന കമ്പികൾ രണ്ടുപേർ ഒരു വാഹനത്തിൽ എത്തിച്ച് കയറ്റി കൊണ്ടുപോകുന്നത് പ്രദേശവാസി ശ്രദ്ധിച്ചതിനെ തുടർന്ന് വിവരം കമ്പനി അധികൃതരെ അറിയിക്കുകയായിരുന്നു. മോഷണത്തിന് പിന്നിൽ ഇതര സംസ്ഥാന തൊഴിലാളികളായിരിക്കാമെന്നതാണ് പ്രാഥമിക നിഗമനം.
സംഭവവുമായി ബന്ധപ്പെട്ട് സ്ഥാപനത്തിലെ എച്ച്.ആർ. ഓഫീസർ അനിൽകുമാർ കുന്നംകുളം പോലീസിൽ നൽകിയ പരാതിയുടെ അടിസ്ഥാനത്തിൽ പോലീസ് കേസ് രജിസ്റ്റർ ചെയ്തു. മേഖലയിലെ സിസിടിവി ദൃശ്യങ്ങൾ ഉൾപ്പെടെ പരിശോധിച്ച് പ്രതികളെ തിരിച്ചറിയുന്നതിനായി അന്വേഷണം പുരോഗമിക്കുകയാണ്.
