കണ്ണൂർ: പതിമൂന്ന് വർഷമായി പോലീസിനെ വെട്ടിച്ച് ഒളിവിൽ കഴിഞ്ഞിരുന്ന പ്രതിയെ സിനിമയെ വെല്ലുന്ന സാഹസിക നീക്കത്തിനൊടുവിൽ ആലക്കോട് പോലീസ് പിടികൂടി. ആലപ്പുഴയിൽ പേര് മാറ്റി ടൂറിസ്റ്റ് ബോട്ട് ഡ്രൈവറായി ജോലി ചെയ്തുവരികയായിരുന്ന ജിനീഷിനെയാണ് പോലീസ് വലയിലാക്കിയത്. പ്രതിയെക്കുറിച്ച് പോലീസിന്റെ കൈവശം ആകെയുണ്ടായിരുന്നത് 15 വർഷം പഴക്കമുള്ള ഒരു ഫോട്ടോയും ഡ്രൈവിങ് ലൈസൻസിന്റെ പകർപ്പും മാത്രമായിരുന്നു.

ആലക്കോട് എസ്.ഐ കെ.ജെ. മാത്യുവിന്റെ നേതൃത്വത്തിൽ നടത്തിയ ശാസ്ത്രീയമായ അന്വേഷണത്തിലൂടെയാണ് പ്രതിയുടെ പുതിയ ഫോൺ നമ്പറും ഒളിത്താവളവും കണ്ടെത്തിയത്.ബോട്ടിൽ നിന്ന് തൊട്ടടുത്ത ബോട്ടുകളിലേക്ക് ചാടിക്കയറി രക്ഷപ്പെടാൻ ശ്രമിച്ച പ്രതിയെ, സ്വന്തം ജീവൻ പണയപ്പെടുത്തി അഞ്ചോളം ബോട്ടുകൾക്ക് മുകളിലൂടെ ചാടിക്കടന്നാണ് പോലീസ് സംഘം കീഴ്പ്പെടുത്തിയത്. ആലപ്പുഴ പോലീസിന്റെ സഹായവും ഈ ഓപ്പറേഷനിൽ ഉണ്ടായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.