ന്യൂ ഡൽഹി: വരുന്ന നിയമസഭാ തിരഞ്ഞെടുപ്പിൽ എൽഡിഎഫിനെ മുഖ്യമന്ത്രി പിണറായി വിജയൻ തന്നെ നയിക്കും. ന്യൂഡൽഹി എകെജി ഭവനിൽ നടന്ന പോളിറ്റ് ബ്യൂറോ യോഗത്തിനു ശേഷം മാധ്യമങ്ങളോട് സംസാരിക്കവേ ജനറൽ സെക്രട്ടറി എം.എം.ബേബിയാണ് പ്രഖ്യാപനം നടത്തിയത്. സ്ഥാനാർഥി ചർച്ചകൾ ഉടൻ ആരംഭിക്കും. മുഖ്യമന്ത്രി ആരെന്നത് ഭൂരിപക്ഷം നോക്കി പിന്നീട് തീരുമാനിക്കും. ആരൊക്കെ മത്സരിക്കുമെന്ന് കുറച്ച് ദിവസത്തിനുള്ളിൽ അറിയാമെന്നും മാർച്ച് ആദ്യ വാരത്തിൽ സ്ഥാനാർത്ഥി പട്ടിക വരുമെന്നും എംഎ ബേബി അറിയിച്ചു.

75 വയസ്സെന്ന പ്രായപരിധിയിൽ പിണറായിക്ക് നേരത്തേ പോളിറ്റ് ബ്യൂറോയിൽ ഇളവ് നൽ‍കിയിരുന്നു. പിണറായി വിജയൻ തന്നെ പാർട്ടിയെ നയിക്കണമെന്ന് സിപിഎം കേരള ഘടകം കേന്ദ്രനേതൃത്വത്തോട് ആവശ്യപ്പെട്ടിരുന്നു. കേരളം ഭരിക്കുന്ന എൽഡിഎഫ് സർക്കാർ രാജ്യത്തിന് തന്നെ മാതൃകയാണെന്നും എംഎ ബേബി പറഞ്ഞു.