കോട്ടയം: പ്രധാനമന്ത്രി നരേന്ദ്ര മോദി 4-ാം തീയതി ചങ്ങനാശ്ശേരിയിലും തിരുവല്ലയിലും എത്തുന്ന സാഹചര്യത്തിൽ ഗതാഗത ക്രമീകരണങ്ങൾ ഏർപ്പെടുത്തി. തിരഞ്ഞെടുപ്പ് പ്രചാരണത്തിന്റെ ഭാഗമായി എത്തുന്ന മോദി ഹെലികോപ്റ്ററിൽ ചങ്ങനാശ്ശേരിയിലെ പെരുന്ന എൻഎസ്എസ് ഹിന്ദു കോളജ് മൈതാനത്ത് ഇറങ്ങും. തുടർന്ന് എം.സി റോഡിലൂടെ കാർ മാർഗം തിരുവല്ലയിലേക്ക് പോകും.

വൈകിട്ട് 3 മണിക്ക് തിരുവല്ല നഗരസഭ മൈതാനത്ത് നടക്കുന്ന എൻഡിഎയുടെ പൊതുപരിപാടിയിൽ അദ്ദേഹം പങ്കെടുക്കും. പ്രധാനമന്ത്രിയുടെ സന്ദർശനത്തെ തുടർന്ന് എം.സി റോഡിൽ തിരുവല്ല മുതൽ ചങ്ങനാശ്ശേരി വരെ ഉച്ചയ്ക്ക് 12 മുതൽ വൈകിട്ട് 6 വരെ ഗതാഗത നിയന്ത്രണം ഉണ്ടാകും. ചങ്ങനാശ്ശേരി എൻഎസ്എസ് കോളജും പരിസര പ്രദേശങ്ങളും ഉച്ചയ്ക്ക് 12 മണിയോടെ പൊലീസ് നിയന്ത്രണത്തിലാക്കും. യാത്രക്കാർ മുൻകരുതൽ സ്വീകരിക്കണമെന്ന് അധികൃതർ അറിയിച്ചു.