കൊച്ചി: എറണാകുളം പിറവത്ത് സിനിമാ തീയേറ്ററിൽ തീപിടിത്തം. ആശിർവാദ് സിനിമാ കോംപ്ലക്സിലാണ് സംഭവം ഉണ്ടായത്. തീപിടിത്തത്തെ തുടർന്ന് കാണികൾ പരിഭ്രാന്തരായി പുറത്തേക്ക് ഓടി. ഇന്ന് രാവിലെയാണ് ആശിർവാദ് സിനിമാ കോംപ്ലക്സ് പ്രവർത്തനം ആരംഭിച്ചത്. തുടർന്ന് “വാഴ 2” സിനിമയുടെ പ്രദർശനം നടക്കുന്നതിനിടെ രാവിലെ 10.45ഓടെ തീയേറ്ററിനുള്ളിൽ പുക ഉയരുകയായിരുന്നു. ഇതോടെ കാണികൾ എല്ലാവരും സുരക്ഷിതമായി പുറത്തേക്ക് ഇറങ്ങി.
സംഭവത്തെ തുടർന്ന് കോംപ്ലക്സിലെ എല്ലാ സ്ക്രീനുകളുടെയും പ്രദർശനം താൽക്കാലികമായി നിർത്തിവച്ചു. പ്രാഥമിക നിഗമനത്തിൽ ഷോർട്ട് സർക്യൂട്ടാണ് തീപിടിത്തത്തിന് കാരണമെന്ന് പറയുന്നു. അഗ്നിശമന സേന സ്ഥലത്തെത്തി തീ നിയന്ത്രണവിധേയമാക്കി. നിലവിൽ ഉദ്യോഗസ്ഥർ തീയേറ്ററിനുള്ളിൽ പരിശോധന നടത്തുകയാണ്. അന്വേഷണം പൂർത്തിയായാൽ തീപിടിത്തത്തിന്റെ യഥാർത്ഥ കാരണം വ്യക്തമാകും.
