ബെൽഫാസ്റ്റ്: ലോകപ്രശസ്ത ടെലിവിഷൻ പരമ്പര ‘ഗെയിം ഓഫ് ത്രോൺസി’ലൂടെ ശ്രദ്ധേയനായ നടനും എഴുത്തുകാരനുമായ മൈക്കൽ പാട്രിക് (35) അന്തരിച്ചു. ദീർഘകാലമായി മോട്ടോർ ന്യൂറോൺ രോഗബാധിതനായി ചികിത്സയിലായിരുന്നു. വടക്കേ ഐർലൻഡിലെ ഹോസ്പൈസിൽ വെച്ചായിരുന്നു അന്ത്യം.
2023 ഫെബ്രുവരി ഒന്നിനാണ് മൈക്കൽ പാട്രിക്കിന് മോട്ടോർ ന്യൂറോൺ രോഗം സ്ഥിരീകരിച്ചത്. ശരീരത്തിലെ പേശികളെ നിയന്ത്രിക്കുന്ന നാഡികൾ ക്രമേണ നശിക്കുന്ന അതീവ ഗുരുതരമായ ഈ രോഗാവസ്ഥ മൂലം കഴിഞ്ഞ കുറച്ചുനാളുകളായി അദ്ദേഹം ശാരീരിക ബുദ്ധിമുട്ടുകൾ നേരിട്ടിരുന്നു. രോഗം മൂർച്ഛിച്ചതിനെത്തുടർന്ന് പത്ത് ദിവസം മുൻപാണ് അദ്ദേഹത്തെ ഹോസ്പൈസിലേക്ക് മാറ്റിയത്.
2016-ൽ പുറത്തിറങ്ങിയ ഗെയിം ഓഫ് ത്രോൺസ് ആറാം സീസണിലെ ‘ദ ബ്രോക്കൺ മാൻ’ എന്ന ശ്രദ്ധേയമായ എപ്പിസോഡിൽ പാട്രിക് വേഷമിട്ടു. ‘ബ്ലൂ ലൈറ്റ്സ്’, ‘ദിസ് ടൗൺ’, ‘ദ സ്പെക്റ്റാക്കുലർ’, ‘ബ്ലാസ്റ്റ്സ് ഫ്രം ദ പാസ്റ്റ്’ തുടങ്ങിയ ജനപ്രിയ ടെലിവിഷൻ ഷോകളിൽ അദ്ദേഹം അഭിനയിച്ചിട്ടുണ്ട്. ഷേക്സ്പിയർ നാടങ്ങളിലും അഭിനയിച്ച അദ്ദേഹം എഴുത്തുകാരനെന്ന നിലയിലും പ്രശസ്തനാണ്.
