ലഖ്നൗ: ഉത്തർപ്രദേശിലെ മഥുരയിൽ യമുന നദിയിൽ ബോട്ട് മറിഞ്ഞുണ്ടായ അപകടത്തിൽ മരിച്ചവരുടെ എണ്ണം 10 ആയി. അപകടത്തിൽപ്പെട്ട ബോട്ട് ശനിയാഴ്ച പുലർച്ചെ കണ്ടെത്തിയെങ്കിലും അഞ്ച് പേരെ ഇപ്പോഴും കണ്ടെത്താനായിട്ടില്ല. 22 പേർക്ക് പരിക്കേറ്റിരുന്നു.
ആഴമുള്ള ചതുപ്പിൽ കുടുങ്ങിയ നിലയിലായിരുന്നു ബോട്ട് കണ്ടെത്തിയത്. ബോട്ടിനുള്ളിൽ മൃതദേഹങ്ങൾ ഒന്നും കണ്ടെത്താനായിട്ടില്ലെന്ന് രക്ഷാപ്രവർത്തനത്തിന് നേതൃത്വം നൽകുന്ന പൊലീസ് ഉദ്യോഗസ്ഥർ അറിയിച്ചു. കാണാതായവർക്കായുള്ള തിരച്ചിൽ തുടരുകയാണ്.
പരിക്കേറ്റവരുടെ നില തൃപ്തികരമാണെന്ന് അധികൃതർ അറിയിച്ചു. മരിച്ചവരുടെ പോസ്റ്റ്മോർട്ടം നടപടികൾ പൂർത്തിയാക്കി മൃതദേഹങ്ങൾ ബന്ധുക്കൾക്ക് കൈമാറാനുള്ള നടപടികൾ പുരോഗമിക്കുകയാണ്. അപകടത്തിന് ഉത്തരവാദികളായവർക്കെതിരെ കർശന നടപടി സ്വീകരിക്കുമെന്നും അധികൃതർ വ്യക്തമാക്കി.
വെള്ളിയാഴ്ച ഉച്ചകഴിഞ്ഞ് പഞ്ചാബിൽ നിന്നുള്ള വിനോദസഞ്ചാരികളുമായി സഞ്ചരിച്ച ബോട്ട് വൃന്ദാവനത്തിന് സമീപം അപകടത്തിൽപെടുകയായിരുന്നു. ഏകദേശം 40 യാത്രക്കാരുമായി പോയ ബോട്ട് ശക്തമായ ഒഴുക്കിൽപ്പെട്ട് പോണ്ടൂൺ പാലത്തിന്റെ അവശിഷ്ടങ്ങളിലേക്ക് ഇടിച്ചാണ് മറിഞ്ഞത്. അനുവദനീയതയെക്കാൾ കൂടുതൽ ആളുകൾ ബോട്ടിൽ കയറിയതായും റിപ്പോർട്ടുണ്ട്.
ജലനിരപ്പ് ഉയർന്നതിനെ തുടർന്ന് മുമ്പ് നീക്കം ചെയ്ത പോണ്ടൂൺ പാലത്തിന്റെ ഭാഗങ്ങൾ നദിയിൽ അവശേഷിച്ചിരുന്നതായി അധികൃതർ പറഞ്ഞു. ശക്തമായ കാറ്റിനെ തുടർന്ന് ബോട്ട് നിയന്ത്രണം വിട്ട് ഇടിച്ച് മറിയുകയായിരുന്നുവെന്ന് നാട്ടുകാർ അറിയിച്ചു.
