കൊച്ചി: മുപ്പത് വർഷത്തെ പ്രവർത്തന പാരമ്പര്യമുള്ള പ്രമുഖ ആസ്തി മാനേജ്‌മെന്റ് കമ്പനിയായ ഫ്രാങ്ക്‌ലിൻ ടെംപ്ൾടൺ കൊച്ചിയിൽ പുതിയ ഓഫീസ് തുറന്നു. പള്ളിമുക്ക് ചർച്ച് ലാൻഡിങ് റോഡിൽ സജ്ജീകരിച്ച ഓഫീസിന്റെ ഉദ്ഘാടനം ഫ്രാങ്ക്‌ലിൻ ടെംപ്ൾടൺ (ഇന്ത്യ) പ്രസിഡന്റ് അവിനാശ് സത്വലേക്കർ നിർവഹിച്ചു. കേരളത്തിലെ നിക്ഷേപ മേഖലയിലുള്ള വലിയ സാധ്യതകൾ കണക്കിലെടുത്താണ് കൊച്ചിയിൽ ഓഫീസ് ആരംഭിക്കുന്നതെന്ന് അദ്ദേഹം ഉദ്ഘാടന വേളയിൽ വ്യക്തമാക്കി. നിലവിൽ ഇന്ത്യയിൽ 37 മ്യൂച്വൽ ഫണ്ട് സ്‌കീമുകളിലായി 1.18 ലക്ഷം കോടി രൂപയുടെ ആസ്തി കൈകാര്യം ചെയ്യുന്ന കമ്പനിക്ക് രാജ്യത്തെ വിപണിയിൽ ശക്തമായ സാന്നിധ്യമാണുള്ളത്. ഫ്രാങ്ക്‌ലിൻ ഇന്ത്യ ലാർജ് ക്യാപ് ഫണ്ട്, മിഡ് ക്യാപ് ഫണ്ട്, ഫ്‌ളെക്‌സി ക്യാപ് ഫണ്ട് എന്നിവയ്ക്ക് 30 വർഷത്തെ പ്രവർത്തന പാരമ്പര്യമുണ്ട്. കൂടാതെ കമ്പനിയുടെ മറ്റ് 19 ഫണ്ടുകൾ 20 വർഷത്തിലേറെയായി വിപണിയിൽ സജീവമാണ്. പുതിയ ഓഫീസ് പ്രവർത്തനമാരംഭിക്കുന്നതോടെ കേരളത്തിലെ നിക്ഷേപകർക്ക് കമ്പനിയുടെ സേവനങ്ങൾ കൂടുതൽ വേഗത്തിലും നേരിട്ടും ലഭ്യമാകാൻ സൗകര്യമൊരുങ്ങും.