കോഴിക്കോട്: ബേപ്പൂർ നിയമസഭാ മണ്ഡലത്തിൽ തദ്ദേശ തിരഞ്ഞെടുപ്പിലെ യു.ഡി.എഫ് പ്രകടനം നിയമസഭാ തിരഞ്ഞെടുപ്പിൽ ആവർത്തിക്കാനാകാത്തത് പി.വി. അൻവറിന് തിരിച്ചടിയായതായി വിലയിരുത്തൽ. അൻവറിന്റെ പരാജയത്തെക്കുറിച്ച് കോൺഗ്രസ് ആഭ്യന്തരമായി പരിശോധന ആരംഭിച്ചു.
ഫറോക്ക് നഗരസഭയിൽ തദ്ദേശ തിരഞ്ഞെടുപ്പിൽ യു.ഡി.എഫിന് 3500 വോട്ടിന്റെ ലീഡ് ഉണ്ടായിരുന്നെങ്കിലും നിയമസഭാ തിരഞ്ഞെടുപ്പിൽ അത് 2804 ആയി കുറഞ്ഞു. 23 വാർഡുകൾ ഉള്ള രാമനാട്ടുകരയിൽ യു.ഡി.എഫിന് 145 വോട്ടിന്റെ ലീഡാണ് ലഭിച്ചത്. ഇവിടെ രണ്ടായിരം വോട്ടിലധികം ഭൂരിപക്ഷം പ്രതീക്ഷിച്ചിരുന്നതായി നേതാക്കൾ പറയുന്നു.
ചെറുവണ്ണൂർ മേഖലയിൽ നാലു വാർഡുകളിൽ യു.ഡി.എഫ് വിജയം നേടിയിരുന്നെങ്കിലും നിയമസഭാ തിരഞ്ഞെടുപ്പിൽ എൽ.ഡി.എഫ് സ്ഥാനാർഥി പി.എ. മുഹമ്മദ് റിയാസിന് 1703 വോട്ടിന്റെ മുൻതൂക്കം ലഭിച്ചു. കടലുണ്ടി പഞ്ചായത്തിൽ എൽ.ഡി.എഫിന്റെ ലീഡ് 2446 ആയി ഉയർന്നു.
ബേപ്പൂർ മേഖലയാണ് റിയാസിന്റെ വിജയത്തിൽ നിർണായകമായത്. ഇവിടെ മാത്രം 5890 വോട്ടിന്റെ ലീഡ് അദ്ദേഹത്തിന് ലഭിച്ചു. മണ്ഡലത്തിൽ എൽ.ഡി.എഫ് വോട്ടുകൾ ശക്തമായി നിലനിർത്താനായതും വിജയത്തിന് സഹായകമായി.
മൊത്തത്തിൽ മണ്ഡലത്തിൽ എൽ.ഡി.എഫിന് 7487 വോട്ടിന്റെ ഭൂരിപക്ഷം ലഭിച്ചെങ്കിലും 2021-ലെ 28,747 വോട്ടിന്റെ ഭൂരിപക്ഷവുമായി താരതമ്യം ചെയ്യുമ്പോൾ വലിയ കുറവാണ് രേഖപ്പെടുത്തിയത്. എൻ.ഡി.എ സ്ഥാനാർഥി കെ.പി. പ്രകാശ്ബാബുവിന് വോട്ടിൽ ചെറിയ വർധന മാത്രമാണ് ഉണ്ടായത്.
