ഗുഡ്ഗാവ്:വീടിനടുത്തുള്ള കടയിലേക്ക് മിഠായി വാങ്ങാൻ പോയ എട്ടുവയസുകാരിയെ തന്ത്രപൂർവ്വം വിളിച്ചുവരുത്തി പീഡിപ്പിച്ച പ്രതിയെ ഹരിയാനയിലെ നൂഹ് ജില്ലയിൽ പോലീസ് പിടികൂടി. കഴിഞ്ഞ വ്യാഴാഴ്ചയാണ് നാടിനെ നടുക്കിയ ഈ സംഭവം നടന്നത്. വീട്ടിൽ നിന്നും കടയിലേക്ക് ഒറ്റയ്ക്ക് പോയ കുട്ടിയെ മയക്കുമരുന്നിന് അടിമയായ പ്രതി തന്റെ വീട്ടിലേക്ക് വിളിച്ചുവരുത്തി പീഡനത്തിന് ഇരയാക്കുകയായിരുന്നു. പ്രതിയുടെ കൈകളിൽ നിന്ന് രക്ഷപ്പെട്ട് വീട്ടിലെത്തിയ പെൺകുട്ടി രക്ഷിതാക്കളോട് വിവരം പറഞ്ഞതോടെയാണ് സംഭവം പുറംലോകമറിഞ്ഞത്.

സംഭവത്തിന് പിന്നാലെ ഒളിവിൽ പോയ പ്രതിയെ വെള്ളിയാഴ്ച തന്നെ പോലീസ് തിരഞ്ഞുപിടിച്ചു. മയക്കുമരുന്നിന് അടിമയായ ഇയാൾ വീട്ടിൽ ഒറ്റയ്ക്കാണ് താമസിച്ചിരുന്നത്. വൈദ്യപരിശോധനയിൽ പെൺകുട്ടി പീഡനത്തിന് ഇരയായതായി സ്ഥിരീകരിച്ചിട്ടുണ്ട്. ഭാരതീയ ന്യായ സംഹിതയിലെ സെക്ഷൻ 96, 137(2), പോക്സോ നിയമത്തിലെ സെക്ഷൻ 6 എന്നീ ഗുരുതരമായ വകുപ്പുകൾ ചുമത്തി നൂഹ് വനിതാ പോലീസ് സ്റ്റേഷനിലാണ് എഫ്ഐആർ രജിസ്റ്റർ ചെയ്തിരിക്കുന്നത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ശാരീരികമായും മാനസികമായും തളർന്ന പെൺകുട്ടിക്ക് നിലവിൽ കൗൺസിലിംഗും വിദഗ്ധ ചികിത്സയും നൽകിവരികയാണെന്ന് പോലീസ് അധികൃതർ അറിയിച്ചു.