വർക്കല: വർക്കല പാപനാശം ബീച്ചിലെ ക്ലിഫ് കുന്നിന്റെ താഴ്ഭാഗം ഇടിഞ്ഞുവീണു. കഴിഞ്ഞ കുറച്ച് ദിവസങ്ങളായി തുടരുന്ന മഴയാണ് മണ്ണിടിച്ചിലിന് കാരണമെന്നാണ് പ്രാഥമിക നിഗമനം. സംഭവത്തെ തുടർന്ന് ടൂറിസം വകുപ്പ് ഉദ്യോഗസ്ഥരും പൊലീസും സ്ഥലത്തെത്തി പരിശോധന നടത്തി. വരും ദിവസങ്ങളിലും മഴ തുടരുമെന്ന സാധ്യത കണക്കിലെടുത്ത് പ്രദേശത്തെത്തുന്ന വിനോദസഞ്ചാരികൾ ജാഗ്രത പാലിക്കണമെന്ന് ടൂറിസം പൊലീസ് മുന്നറിയിപ്പ് നൽകി.
കുന്നിന്റെ മുകൾഭാഗത്ത് വീണ്ടും മണ്ണിടിച്ചിൽ ഉണ്ടായാൽ സമീപവാസികൾക്കും സഞ്ചാരികൾക്കും അപകടസാധ്യത ഉണ്ടാകാമെന്ന് നാട്ടുകാർ ആശങ്ക പ്രകടിപ്പിച്ചു. അപകടസാധ്യത ഒഴിവാക്കാൻ അധികൃതർ അടിയന്തര നടപടികൾ സ്വീകരിക്കണമെന്നും ക്ലിഫ് പ്രദേശത്ത് ശാശ്വത സുരക്ഷാ സംവിധാനങ്ങൾ ഒരുക്കണമെന്നും നാട്ടുകാർ ആവശ്യപ്പെട്ടു.
