ജക്കാർത്ത: പ്രധാനമന്ത്രി നരേന്ദ്രമോദിക്ക് ഇൻഡൊനീഷ്യയുടെ പരമോന്നത സിവിലിയൻ ബഹുമതി പ്രഖ്യാപിച്ചു. വിദേശ ഭരണാധികാരികൾക്കും രാഷ്ട്രത്തലവന്മാർക്കും നൽകുന്ന ‘ബിന്താങ് റിപ്പബ്ലിക് ഇൻഡൊനീഷ്യ ആദിപൂർണ’ (Star of the Republic of Indonesia, First Class) പുരസ്‌കാരമാണ് മോദിക്ക് ലഭിക്കുക.

ഇന്ത്യയും ഇൻഡൊനീഷ്യയും തമ്മിലുള്ള ബന്ധം ശക്തിപ്പെടുത്തുന്നതിലും ഉഭയകക്ഷി സഹകരണം മെച്ചപ്പെടുത്തുന്നതിലും നൽകിയ സംഭാവനകൾ പരിഗണിച്ചാണ് പുരസ്‌കാരം നൽകുന്നതെന്ന് ഇൻഡൊനീഷ്യൻ സർക്കാർ അറിയിച്ചു.

പ്രധാനമന്ത്രി നരേന്ദ്രമോദിയുടെ ഇൻഡൊനീഷ്യ സന്ദർശനത്തിനിടെ ജക്കാർത്തയിൽ നടന്ന ഉഭയകക്ഷി ചർച്ചകൾക്ക് ശേഷമാണ് പ്രസിഡന്റ് പ്രബോവോ സുബിയാന്തോ പുരസ്‌കാര പ്രഖ്യാപനം നടത്തിയത്. തുടർന്ന് നടന്ന ചടങ്ങിൽ പുരസ്‌കാരം സമ്മാനിച്ചു.

അന്താരാഷ്ട്ര തലത്തിൽ നിരവധി രാജ്യങ്ങൾ ഇതിനുമുമ്പും പ്രധാനമന്ത്രി നരേന്ദ്രമോദിയെ അവരുടെ പരമോന്നത ബഹുമതികൾ നൽകി ആദരിച്ചിട്ടുണ്ട്. അമേരിക്ക, റഷ്യ, ഫ്രാൻസ്, ഗ്രീസ്, യുഎഇ, സൗദി അറേബ്യ, കുവൈത്ത് തുടങ്ങിയ 27 രാജ്യങ്ങളുടെ പുരസ്‌കാരങ്ങൾക്ക് പിന്നാലെയാണ് ഇൻഡൊനീഷ്യയുടെ ഈ ബഹുമതി.