മസ്കറ്റ്: ഒമാനിലെ മത്രാ വിലായത്തിൽ സ്വർണക്കട കുത്തിത്തുറന്ന് കവർച്ച നടത്താൻ ശ്രമിച്ച കേസിൽ നാല് ഏഷ്യൻ സ്വദേശികളെ റോയൽ ഒമാൻ പൊലീസ് അറസ്റ്റ് ചെയ്തു. കടയുടെ ഭിത്തി തകർത്ത് അകത്ത് കടന്ന് സ്വർണാഭരണങ്ങൾ കവർന്നെടുക്കാനായിരുന്നു പ്രതികളുടെ ശ്രമമെന്ന് പൊലീസ് അറിയിച്ചു.
സംഭവത്തെ തുടർന്ന് മസ്കറ്റ് ഗവർണറേറ്റ് പൊലീസ് കമാൻഡിന്റെ നേതൃത്വത്തിൽ വ്യാപക അന്വേഷണം ആരംഭിച്ചു. വടക്കൻ അൽ ബതിന, ദോഫാർ പൊലീസ് കമാൻഡുകളുടെ സഹകരണത്തോടെയാണ് പ്രതികളെ തിരിച്ചറിഞ്ഞ് പിടികൂടിയത്.
അന്വേഷണത്തിൽ, സ്വർണക്കടയുടെ ചുമർ പൊളിച്ച് അകത്ത് പ്രവേശിച്ച ശേഷം സ്വർണാഭരണങ്ങൾ മോഷ്ടിക്കാനായിരുന്നു പ്രതികളുടെ പദ്ധതിയെന്ന് വ്യക്തമായതായി പൊലീസ് അറിയിച്ചു. സമയോചിതമായ അന്വേഷണത്തിലൂടെയാണ് പ്രതികളെ അറസ്റ്റ് ചെയ്യാൻ കഴിഞ്ഞത്.
പ്രതികൾക്കെതിരെ സ്വത്ത് നശിപ്പിക്കൽ, കവർച്ചാശ്രമം എന്നിവ ഉൾപ്പെടെയുള്ള കുറ്റങ്ങൾ ചുമത്തിയിട്ടുണ്ട്. അറസ്റ്റിലായവർ ഏഷ്യൻ സ്വദേശികളാണെന്ന് മാത്രമാണ് പൊലീസ് വ്യക്തമാക്കിയിട്ടുള്ളത്. ഇവരുടെ ദേശീയത സംബന്ധിച്ച കൂടുതൽ വിവരങ്ങൾ പുറത്തുവിട്ടിട്ടില്ല.
കേസുമായി ബന്ധപ്പെട്ട നിയമനടപടികൾ പുരോഗമിക്കുകയാണെന്നും വ്യാപാര സ്ഥാപനങ്ങളിൽ കവർച്ച നടത്താൻ ശ്രമിക്കുന്നവർക്കെതിരെ കർശന നടപടി തുടരുമെന്നും റോയൽ ഒമാൻ പൊലീസ് അറിയിച്ചു.
