തിരുവനന്തപുരം: മുഖ്യമന്ത്രിയുടെ പൊലീസ് മെഡലുകൾ ഇന്ന് പ്രഖ്യാപിക്കില്ല. മെഡലിന് അർഹരായവരുടെ പട്ടികയിലെ പരിശോധന പൂർത്തിയാകാത്തതാണ് പ്രഖ്യാപനം മാറ്റാൻ കാരണം. ഇന്ന് മെഡൽ പ്രഖ്യാപിക്കാനായിരുന്നു നേരത്തെ തീരുമാനിച്ചിരുന്നത്.

മെഡൽ പട്ടിക തയ്യാറാക്കുന്നതിലും പരിശോധന പൂർത്തിയാക്കുന്നതിലും ആഭ്യന്തര വകുപ്പ് ഉദ്യോഗസ്ഥർക്ക് ഗുരുതര വീഴ്ച സംഭവിച്ചതായാണ് വിവരം. മാർച്ച് മാസത്തിൽ പൊലീസ് ആസ്ഥാനത്ത് നിന്ന് മെഡലിന് അർഹരായ ഉദ്യോഗസ്ഥരുടെ പട്ടിക ആഭ്യന്തര വകുപ്പിന് കൈമാറിയിരുന്നു.

എന്നാൽ പട്ടികയിൽ സമയബന്ധിതമായി പരിശോധന പൂർത്തിയാക്കിയില്ല. പട്ടികയിൽ പരാതി ഉയർന്നതിനെ തുടർന്ന് അത് ആഭ്യന്തര വകുപ്പ് പൊലീസ് ആസ്ഥാനത്തേക്ക് മടക്കി അയച്ചിരുന്നു. പിന്നീട് തുടർനടപടികൾ ഉണ്ടായില്ലെന്നാണ് പുറത്തുവരുന്ന വിവരം. മെഡൽ പട്ടികയ്ക്ക് അന്തിമ അംഗീകാരം നൽകുന്നതിനായി ആഭ്യന്തര സെക്രട്ടറി യോഗം ചേരുന്നത് ഈ മാസം 20നാണ്. ഇതിന് ശേഷമായിരിക്കും മെഡൽ പ്രഖ്യാപനത്തിൽ അന്തിമ തീരുമാനം ഉണ്ടാകുക.