കണ്ണൂർ: സിപിഎമ്മിൽ സംഘടനാ ദൗർബല്യം വലിയ പ്രശ്നമായി മാറിയെന്ന് മുതിർന്ന നേതാവ് ഇ.പി. ജയരാജൻ. ശത്രുക്കളുടെ പ്രചാരണങ്ങളെയും കടന്നാക്രമണങ്ങളെയും ഫലപ്രദമായി നേരിടാൻ പാർട്ടിക്ക് കഴിഞ്ഞില്ലെന്നും അദ്ദേഹം പറഞ്ഞു.
ഇടതുപാർട്ടി എന്ന നിലയിൽ സിപിഎമ്മിന്റെ പ്രസക്തിക്ക് കോട്ടം സംഭവിച്ചെന്നും സ്ഥാനാർഥി നിർണയത്തിലും പാളിച്ചകളുണ്ടായെന്നും ജയരാജൻ ചൂണ്ടിക്കാട്ടി. പാർട്ടിയുടെ പല ബ്രാഞ്ചുകളും ഫലപ്രദമായി പ്രവർത്തിക്കുന്നില്ലെന്നും ബ്രാഞ്ച് യോഗങ്ങൾ ചേരുന്നത് പരിമിതമായെന്നും അദ്ദേഹം പറഞ്ഞു.
പാർട്ടി അംഗങ്ങൾ തങ്ങളുടെ ഉത്തരവാദിത്തം കൃത്യമായി നിർവഹിച്ചില്ലെന്നും ബ്രാഞ്ച് സെക്രട്ടറിമാർക്ക് ഫലപ്രദമായി നേതൃത്വം നൽകാൻ കഴിഞ്ഞില്ലെന്നും ജയരാജൻ വിമർശിച്ചു. ലോക്കൽ, ഏരിയാ കമ്മിറ്റികൾ ഇത്തരം വീഴ്ചകൾ തിരുത്തുന്നതിലും പരാജയപ്പെട്ടെന്ന് അദ്ദേഹം പറഞ്ഞു.
ബിജെപിയുമായി ബന്ധമുണ്ടെന്ന പ്രചാരണം പ്രതിരോധിക്കാൻ പാർട്ടിക്ക് കഴിഞ്ഞില്ലെന്നും ചില വ്യക്തികളുടെ തെറ്റായ പ്രവണതകൾ പാർട്ടിയെ ബാധിക്കുന്നുണ്ടെന്നും ജയരാജൻ പറഞ്ഞു. സിപിഎം ജനങ്ങളിൽ നിന്ന് അകന്നുപോയെന്ന വിമർശനവും ഉയർന്നതായി അദ്ദേഹം ചൂണ്ടിക്കാട്ടി.
പാർട്ടി പണപ്പിരിവുമായി മാത്രം മുന്നോട്ട് പോകുന്നുവെന്ന ആരോപണം ഉണ്ടായെന്നും പലസ്തീൻ വിഷയത്തിലെ സിപിഎം നിലപാട് മുസ്ലിം പ്രീണനമായി പ്രചരിപ്പിക്കപ്പെട്ടെന്നും അദ്ദേഹം പറഞ്ഞു. ശബരിമല ഉൾപ്പെടെയുള്ള വിഷയങ്ങളിൽ എതിരാളികൾ നടത്തിയ ധ്രുവീകരണത്തെയും ഫലപ്രദമായി നേരിടാൻ കഴിഞ്ഞില്ലെന്നും ജയരാജൻ വ്യക്തമാക്കി.
യുഡിഎഫിന്റെയും ബിജെപിയുടെയും പ്രചാരണങ്ങളെ പ്രതിരോധിക്കുന്നതിലും പാർട്ടി പിന്നിലായെന്ന് അദ്ദേഹം പറഞ്ഞു. സംഘടനാ ദൗർബല്യവും സ്ഥാനാർഥി നിർണയത്തിലെ പാളിച്ചകളും തിരിച്ചടിയായെന്നും ജയരാജൻ വിലയിരുത്തി.
ഭരണം നഷ്ടപ്പെട്ടതല്ല, പാർട്ടിയുടെ വോട്ട് കുറഞ്ഞതാണ് പ്രധാന പ്രശ്നമെന്നും അദ്ദേഹം പറഞ്ഞു. സ്വന്തം വോട്ടർമാർ തന്നെ എതിരായി വോട്ട് ചെയ്ത സാഹചര്യമുണ്ടായെന്നും നേതൃതലത്തിൽ പ്രവർത്തിച്ച ചിലർ പാർട്ടി വിട്ടുപോയെന്നും ജയരാജൻ ചൂണ്ടിക്കാട്ടി.
“നമ്മളാണ് പാർട്ടിയുടെ മുഖം. ആ മുഖം വ്യക്തതയുള്ളതും വികൃതമല്ലാത്തതുമായിരിക്കണം” എന്നും അദ്ദേഹം പറഞ്ഞു. വിശാല ജില്ലാ കമ്മിറ്റി സ്വാഗത സംഘം രൂപീകരണ യോഗത്തിലായിരുന്നു ഇ.പി. ജയരാജന്റെ വിമർശനം.
