ഹൈദരാബാദ്: ഇന്ത്യ–വെസ്റ്റ് ഇൻഡീസ് നാലാം ടി20 മത്സരത്തിനുള്ള സൗജന്യ പ്രവേശന പാസുകൾ കരിഞ്ചന്തയിൽ ഉയർന്ന വിലയ്ക്ക് വിറ്റ സംഭവത്തിൽ ഹൈദരാബാദ് ക്രിക്കറ്റ് അസോസിയേഷൻ അംഗം ഉൾപ്പെടെ നാലുപേരെ പൊലീസ് അറസ്റ്റ് ചെയ്തു. ഉപ്പലിലെ രാജീവ് ഗാന്ധി അന്താരാഷ്ട്ര സ്റ്റേഡിയത്തിൽ നടക്കാനിരിക്കുന്ന മത്സരത്തിന് മുന്നോടിയായി, ‘വിൽപ്പനയ്ക്കുള്ളതല്ല’ എന്ന് രേഖപ്പെടുത്തിയ 11 സൗജന്യ പാസുകളും പൊലീസ് പിടിച്ചെടുത്തു.
ഹൈദരാബാദ് ക്രിക്കറ്റ് അസോസിയേഷൻ അംഗമായ സതീഷ് ചന്ദ്ര ശ്രീവാസ്തവ, മകൻ ആകർഷിത് ശ്രീവാസ്തവ, അവിനാഷ് ദാരക്, മോഹിത് സോമാനി എന്നിവരാണ് അറസ്റ്റിലായത്. ഒക്ടോബർ 12ന് ബീഗം ബസാറിലെ എസ്.ഡി. മാളിന് സമീപം പാസുകൾ വിൽക്കുന്നുണ്ടെന്ന വിവരത്തെ തുടർന്നാണ് ഗോഷാമഹൽ പൊലീസ് അന്വേഷണം ആരംഭിച്ചത്. രാത്രി ഒമ്പത് മണിയോടെ അവിനാഷ് ദാരക്കിനെയും മോഹിത് സോമാനിയെയും പൊലീസ് കസ്റ്റഡിയിലെടുത്തു.
ക്രിക്കറ്റ് മത്സരത്തിനുള്ള പാസുകൾക്ക് പുറമെ നവരാത്രി ദാന്ധിയ പരിപാടിയുടെ എട്ട് പാസുകൾ, 5,000 രൂപ, മൊബൈൽ ഫോണുകൾ, ഇരുചക്രവാഹനം എന്നിവയും ഇവരിൽനിന്ന് പിടിച്ചെടുത്തു.
ചോദ്യം ചെയ്യലിൽ, എച്ച്.സി.എ അംഗമായ സതീഷ് ചന്ദ്ര ശ്രീവാസ്തവയിൽനിന്നാണ് മകൻ ആകർഷിത് സൗജന്യ പാസുകൾ സംഘടിപ്പിച്ചതെന്ന് വ്യക്തമായതായി പൊലീസ് അറിയിച്ചു. തുടർന്ന് മോഹിത് സോമാനിയുടെ സഹായത്തോടെ പാസുകൾ അവിനാഷ് ദാരക്കിന് കൈമാറി. വാട്സ്ആപ്പ്, ഇൻസ്റ്റഗ്രാം തുടങ്ങിയ സാമൂഹികമാധ്യമങ്ങളിലൂടെ ഉയർന്ന വിലയ്ക്ക് പാസുകൾ വിൽക്കാൻ പരസ്യം നൽകുകയായിരുന്നു. പവലിയനുകൾക്കനുസരിച്ച് 3,500 രൂപ മുതൽ 6,000 രൂപ വരെയാണ് ഓരോ പാസിനും ഈടാക്കിയിരുന്നത്. ഇത്തരത്തിൽ ഒമ്പതോളം സൗജന്യ പാസുകൾ വിറ്റതായും പൊലീസ് വ്യക്തമാക്കി.
സതീഷ് ചന്ദ്ര ശ്രീവാസ്തവയ്ക്ക് എത്ര സൗജന്യ പാസുകൾ നൽകിയിരുന്നുവെന്ന് വ്യക്തമാക്കാൻ ഹൈദരാബാദ് ക്രിക്കറ്റ് അസോസിയേഷന് പൊലീസ് കത്തുനൽകും. അറസ്റ്റിലായ നാലുപേരെയും ഒക്ടോബർ 13ന് ജുഡീഷ്യൽ കസ്റ്റഡിയിൽ റിമാൻഡ് ചെയ്തു.
ഭാരതീയ ന്യായ സംഹിതയിലെ 112(1), 318(2) വകുപ്പുകൾക്കും സിറ്റി പൊലീസ് ആക്ടിലെ 21-ാം വകുപ്പിനും കീഴിലാണ് കേസെടുത്തിരിക്കുന്നത്. ‘വിൽപ്പനയ്ക്കുള്ളതല്ല’ എന്ന് രേഖപ്പെടുത്തിയ പാസുകൾ വാങ്ങുന്നതും വിൽക്കുന്നതും നിയമനടപടിക്ക് കാരണമാകുമെന്ന് പൊലീസ് മുന്നറിയിപ്പ് നൽകി. ഔദ്യോഗിക മാർഗങ്ങളിലൂടെ മാത്രം മത്സര ടിക്കറ്റുകൾ വാങ്ങണമെന്നും ആരാധകരോട് നിർദേശിച്ചു.
അഞ്ച് മത്സരങ്ങളടങ്ങിയ പരമ്പരയിൽ ഇന്ത്യ നിലവിൽ 2–1ന് മുന്നിലാണ്.
