കണ്ണൂര്‍: കണ്ണൂരിൽ മുൻ ആരോഗ്യമന്ത്രി വീണാ ജോർജിനെതിരെ കെഎസ്‌യു നടത്തിയ പ്രതിഷേധവുമായി ബന്ധപ്പെട്ട കേസിൽ ഗൺമാന്റെ പുതിയ മൊഴി പുറത്തുവന്നതിന് പിന്നാലെ വീണാ ജോർജിനും ഗൺമാൻ അഭിലാഷിനുമെതിരെ നടപടിക്ക് നീക്കം. കെഎസ്‌യു നൽകിയ പരാതിയിൽ വീണാ ജോർജിനെതിരെ കേസെടുക്കുന്നത് ആഭ്യന്തരവകുപ്പിന്റെ പരിഗണനയിലാണെന്നാണ് വിവരം. പൊതുസമൂഹത്തെ തെറ്റിദ്ധരിപ്പിച്ചെന്ന ആരോപണത്തിലാണ് നടപടി ആലോചിക്കുന്നത്. ഗൺമാൻ അഭിലാഷിനെ സസ്‌പെൻഡ് ചെയ്യാനുള്ള നീക്കവും നടക്കുന്നുണ്ടെന്നാണ് ആഭ്യന്തരവകുപ്പുമായി ബന്ധപ്പെട്ട വൃത്തങ്ങൾ നൽകുന്ന സൂചന. വീണാ ജോർജിനെതിരെ കെഎസ്‌യു നേരത്തെ ഡിജിപിക്ക് പരാതി നൽകിയിരുന്നു. കേസിലെ നടപടികൾ വേഗത്തിലാക്കാൻ ആഭ്യന്തരമന്ത്രി രമേശ് ചെന്നിത്തലയും നിർദേശം നൽകിയതായാണ് വിവരം.

വീണാ ജോർജ് പൊതുസമൂഹത്തെ തെറ്റിദ്ധരിപ്പിച്ചെന്നും കള്ളമൊഴി നൽകാൻ ഗൺമാനെ നിർബന്ധിച്ചെന്നുമാണ് കെഎസ്‌യുവിന്റെ പരാതിയിലെ ആരോപണം. വീണാ ജോർജിനെതിരെ വഞ്ചനാക്കുറ്റം ചുമത്തണമെന്നും പരാതിയിൽ ആവശ്യപ്പെട്ടിരുന്നു. കെഎസ്‌യു പ്രവർത്തകർ തന്നെ ശാരീരികമായി ആക്രമിച്ചെന്നും മാരകായുധങ്ങൾ ഉപയോഗിച്ചെന്നും വ്യാജമൊഴി നൽകിയതിലൂടെ വീണാ ജോർജ് പൊതുസമൂഹത്തെയും നിയമവ്യവസ്ഥയെയും തെറ്റിദ്ധരിപ്പിച്ചെന്നാണ് പരാതിയിൽ പറയുന്നത്.

ആയുധങ്ങൾ ഉപയോഗിച്ച് ആക്രമിക്കാൻ ശ്രമിച്ചെന്ന മൊഴി വീണാ ജോർജിന്റെ നിർദേശപ്രകാരമാണ് നൽകിയതെന്ന് ഗൺമാൻ അഭിലാഷ് പ്രത്യേക അന്വേഷണ സംഘത്തിന് നൽകിയ പുതിയ മൊഴിയാണ് ഇന്നലെ പുറത്തുവന്നത്. കെഎസ്‌യു പ്രവർത്തകർ വീണാ ജോർജിനെ ആക്രമിക്കുന്നത് താൻ കണ്ടിട്ടില്ലെന്നും വീണയുടെ നിർദേശപ്രകാരമാണ് അന്ന് റെയിൽവേ പൊലീസിന് മൊഴി നൽകിയതെന്നുമാണ് അഭിലാഷ് പറഞ്ഞതെന്നാണ് വിവരം. അഭിലാഷിന്റെ ആദ്യ മൊഴിയുടെ അടിസ്ഥാനത്തിലായിരുന്നു വധശ്രമം ഉൾപ്പെടെയുള്ള വകുപ്പുകൾ ചുമത്തി പൊലീസ് കേസെടുത്തത്.

മുൻ സർക്കാരിന്റെ കാലത്ത് ഭരണപക്ഷവും പ്രതിപക്ഷവും തമ്മിൽ വലിയ വാദപ്രതിവാദങ്ങൾക്ക് വഴിവെച്ച സംഭവമായിരുന്നു ഇത്. കേസ് അന്വേഷിക്കാൻ ആഭ്യന്തരവകുപ്പ് പ്രത്യേക അന്വേഷണ സംഘത്തെ നിയോഗിച്ചിരുന്നു. കണ്ണൂർ എംഎൽഎ ടി.ഒ. മോഹനൻ നൽകിയ പരാതിയുടെ അടിസ്ഥാനത്തിലായിരുന്നു അന്വേഷണം. കെഎസ്‌യു പ്രവർത്തകർക്കെതിരെ വധശ്രമം ഉൾപ്പെടെയുള്ള വകുപ്പുകൾ ചുമത്തിയതിന് പിന്നിൽ ഉന്നതതല ഗൂഢാലോചനയുണ്ടെന്ന ആരോപണവും കെഎസ്‌യു ഉയർത്തിയിരുന്നു. ഈ ആരോപണവും അന്വേഷണത്തിന്റെ പരിധിയിലുണ്ട്.

ഈ വർഷം ഫെബ്രുവരി 25ന് കണ്ണൂർ റെയിൽവേ സ്റ്റേഷനിൽ വെച്ചാണ് അന്നത്തെ ആരോഗ്യമന്ത്രി വീണാ ജോർജിനെതിരെ കെഎസ്‌യു പ്രവർത്തകർ പ്രതിഷേധിച്ചത്. കെഎസ്‌യു ജില്ലാ പ്രസിഡന്റ് ഉൾപ്പെടെ അഞ്ച് പേർക്കെതിരെയാണ് കേസെടുത്തത്. തുടക്കത്തിൽ വധശ്രമം ഉൾപ്പെടെയുള്ള ഗുരുതര വകുപ്പുകൾ ചുമത്തിയെങ്കിലും പിന്നീട് അവ നീക്കം ചെയ്തു. മാരകായുധങ്ങൾ ഉപയോഗിച്ച് ആക്രമിച്ചെന്നായിരുന്നു ആദ്യഘട്ടത്തിലെ മൊഴി. എന്നാൽ, സിസിടിവി ദൃശ്യങ്ങൾ ഉൾപ്പെടെ പരിശോധിച്ച് നടത്തിയ അന്വേഷണത്തിൽ മാരകായുധങ്ങൾ ഉപയോഗിച്ചിട്ടില്ലെന്നാണ് കണ്ടെത്തിയിരുന്നത്.