കാസർകോട്: സന്ദീപ് വാര്യർ തൃക്കരിപ്പൂർ എംഎൽഎയായത് വലിയ ദുരന്തമാണെന്ന് എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ്. തൃക്കരിപ്പൂരിലെ ജനങ്ങളെ കുറ്റപ്പെടുത്തുന്നില്ലെന്നും എന്നാൽ സംഭവിച്ചത് വലിയ ദുരന്തമാണെന്ന് പറയേണ്ടിവരുമെന്നും അദ്ദേഹം പറഞ്ഞു. ഡിവൈഎഫ്ഐ തിമിരി മേഖല കമ്മിറ്റി സംഘടിപ്പിച്ച ഗ്രാമോത്സവം ഉദ്ഘാടനം ചെയ്യുകയായിരുന്നു സഞ്ജീവ്.

മനുഷ്യർ ഒന്നിച്ചിരിക്കുന്നതുപോലും അംഗീകരിക്കാൻ കഴിയാത്തയാളാണ് സന്ദീപ് വാര്യരെന്ന് സഞ്ജീവ് വിമർശിച്ചു. ആന ചരിഞ്ഞ സംഭവത്തെപ്പോലും വർഗീയതയുടെ കണ്ണിലൂടെ കണ്ടയാളാണ് സന്ദീപെന്നും അദ്ദേഹം ആരോപിച്ചു. ഗാന്ധിജിയെ ഗോഡ്‌സെ വെടിവെച്ചുകൊന്നതിനെക്കുറിച്ച് സന്ദീപ് നടത്തിയ പരാമർശങ്ങളും സഞ്ജീവ് വിമർശനത്തിന് വിധേയമാക്കി.

മുൻ മുഖ്യമന്ത്രി ഇ.കെ. നായനാർ പ്രതിനിധീകരിച്ച മണ്ഡലമാണ് തൃക്കരിപ്പൂരെന്നും ഇപ്പോൾ ആ സ്ഥാനത്താണ് സന്ദീപ് വാര്യർ എത്തിയിരിക്കുന്നതെന്നും സഞ്ജീവ് പറഞ്ഞു. രാഷ്ട്രീയത്തിൽ അഭിപ്രായവ്യത്യാസങ്ങൾ ഉണ്ടാകാം. എന്നാൽ തൃക്കരിപ്പൂരിന്റെ രാഷ്ട്രീയ പാരമ്പര്യം ബലികൊടുക്കരുതെന്നും അദ്ദേഹം കൂട്ടിച്ചേർത്തു.

നേരത്തെ ബിജെപി നേതാവായിരുന്ന സന്ദീപ് വാര്യർ 2024ലാണ് കോൺഗ്രസിൽ ചേർന്നത്. ബിജെപിയിലായിരുന്ന സമയത്ത് നടത്തിയ പരാമർശങ്ങളാണ് സഞ്ജീവിന്റെ വിമർശനത്തിന് പ്രധാന കാരണം. പിന്നീട് കോൺഗ്രസ് വക്താവായും കെപിസിസി ജനറൽ സെക്രട്ടറിയായും സന്ദീപ് ചുമതലയേറ്റു. തുടർന്നാണ് നിയമസഭാ തെരഞ്ഞെടുപ്പിൽ തൃക്കരിപ്പൂരിൽ നിന്ന് യുഡിഎഫ് സ്ഥാനാർഥിയായി വിജയിച്ചത്.