ന്യൂഡൽഹി: ഐപിഎല്ലിന്റെ 20-ാം സീസണിന് മുന്നോടിയായി താരക്കൈമാറ്റ വിപണിയിൽ വൻ നീക്കങ്ങൾ. ബ്ലോക്ക്ബസ്റ്റർ ട്രേഡുകളും അപ്രതീക്ഷിത നിലനിർത്തലുകളും പുതിയ താരങ്ങളുടെ വരവുമെല്ലാമായി ഫ്രാഞ്ചൈസികൾ അടുത്ത സീസണിനുള്ള ഒരുക്കങ്ങൾ സജീവമാക്കിയിരിക്കുകയാണ്. ട്രേഡ് വിൻഡോയിലെ സമയപരിധി അവസാനിക്കാൻ ഏഴ് ദിവസം മാത്രം ശേഷിക്കെ ഔദ്യോഗികമായ കൈമാറ്റങ്ങൾക്കൊപ്പം നിരവധി വമ്പൻ ട്രേഡ് അഭ്യൂഹങ്ങളും സജീവമാണ്.

ഡൽഹിയിൽ തിരിച്ചെത്തി റിഷഭ് പന്ത്
2027 സീസണിന് മുന്നോടിയായി ശ്രദ്ധേയമായ ആദ്യ ട്രേഡ് ലഖ്‌നൗ സൂപ്പർ ജയന്റ്‌സും ഡൽഹി ക്യാപിറ്റൽസും തമ്മിലായിരുന്നു. റിഷഭ് പന്ത് ഡൽഹിയിലേക്ക് തിരിച്ചെത്തിയപ്പോൾ പകരമായി കുൽദീപ് യാദവിനെയാണ് ലഖ്‌നൗ സ്വന്തമാക്കിയത്. 15 കോടി രൂപയാണ് പന്തിന്റെ ട്രേഡ് മൂല്യം. കുൽദീപിന്റേത് 13.5 കോടി രൂപയും.

കഴിഞ്ഞ സീസണിൽ മധ്യനിരയിലെ സ്ഥിരതയില്ലായ്മ ഡൽഹിയെ കാര്യമായി ബാധിച്ചിരുന്നു. നാലാം നമ്പറിൽ മികച്ചൊരു ബാറ്ററെ കണ്ടെത്താനുള്ള ശ്രമങ്ങൾ പരാജയപ്പെട്ട സാഹചര്യത്തിൽ പന്തിന്റെ തിരിച്ചുവരവ് ടീമിന് വലിയ ആശ്വാസമാകും. മറുവശത്ത് കുൽദീപിന്റെ വരവ് ലഖ്‌നൗവിന്റെ ബൗളിങ് നിരയ്ക്ക് കൂടുതൽ കരുത്തുപകരും. ദിഗ്‌വേശ് റാത്തിക്കൊപ്പം കുൽദീപ് കൂടി ചേരുന്നതോടെ വിക്കറ്റ് വീഴ്ത്താൻ ശേഷിയുള്ള മികച്ചൊരു സ്പിൻ നിരയാണ് ലഖ്‌നൗവിന് ലഭിക്കുന്നത്.

നടരാജനെ കൈമാറി ഡൽഹി; ഹൈദരാബാദിന് നേട്ടമോ?
ഡൽഹിയുടെ മറ്റൊരു പ്രധാന ട്രേഡ് ടി. നടരാജനെ സൺറൈസേഴ്‌സ് ഹൈദരാബാദിന് കൈമാറിയതാണ്. അഞ്ച് കോടി രൂപയുടെ ട്രേഡിൽ പകരമായി വലംകൈ സ്പിന്നർ സീഷൻ അൻസാരിയെയാണ് ഡൽഹിക്ക് ലഭിച്ചത്.

എന്നാൽ ഈ കൈമാറ്റം ഡൽഹിയുടെ ബൗളിങ് നിരയെ ദുർബലമാക്കുമെന്ന വിലയിരുത്തലുകളുണ്ട്. മിച്ചൽ സ്റ്റാർക്കിന്റെ അടുത്ത സീസണിലെ ലഭ്യത സംബന്ധിച്ച് വ്യക്തതയില്ലാത്ത സാഹചര്യത്തിൽ നടരാജൻ ടീമിന് നിർണായക താരമായിരുന്നു. ന്യൂബോളിലും ഡെത്ത് ഓവറുകളിലും ഒരുപോലെ മികവ് പുലർത്താൻ കഴിയുന്ന നടരാജനെ കൈവിട്ടത് ഡൽഹിക്ക് തിരിച്ചടിയായേക്കാം.

ചെന്നൈ–ഹൈദരാബാദ് കൈമാറ്റത്തിൽ നാല് താരങ്ങൾ
ഇതുവരെ റിപ്പോർട്ട് ചെയ്യപ്പെട്ട ഔദ്യോഗിക ട്രേഡുകളിൽ കൂടുതൽ താരങ്ങൾ ഉൾപ്പെട്ടിരിക്കുന്നത് ചെന്നൈ സൂപ്പർ കിങ്‌സും സൺറൈസേഴ്‌സ് ഹൈദരാബാദും തമ്മിലുള്ള കൈമാറ്റത്തിലാണ്. ലിയാം ലിവിങ്‌സ്റ്റണും ജാക്ക് എഡ്വേർഡ്‌സും ചെന്നൈയിലെത്തിയപ്പോൾ ഖലീൽ അഹമ്മദും നഥാൻ എല്ലിസും ഹൈദരാബാദിലേക്ക് മാറി.

അതേസമയം, ചെന്നൈയുടെ മറ്റൊരു വലിയ നീക്കത്തെക്കുറിച്ചും അഭ്യൂഹങ്ങൾ ശക്തമാണ്. രവീന്ദ്ര ജഡേജയ്ക്ക് പകരക്കാരനെ കണ്ടെത്താനുള്ള ശ്രമത്തിലാണ് ചെന്നൈയെന്നും അക്‌സർ പട്ടേലിനെ ടീമിലെത്തിക്കാൻ നീക്കമുണ്ടെന്നുമാണ് റിപ്പോർട്ടുകൾ. അക്‌സറും ഡെവാൾഡ് ബ്രെവിസും ഉൾപ്പെടുന്ന കൈമാറ്റത്തിനൊപ്പം ലിവിങ്‌സ്റ്റണിന്റെ വരവും ബന്ധപ്പെടുത്തിയാണ് റിപ്പോർട്ടുകൾ പുറത്തുവരുന്നത്. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണം വന്നിട്ടില്ല.

പാറ്റ് കമ്മിൻസിന്റെ ലഭ്യത സംബന്ധിച്ച അനിശ്ചിതത്വം നിലനിൽക്കുന്ന സാഹചര്യത്തിൽ ഖലീൽ അഹമ്മദിന്റെയും നഥാൻ എല്ലിസിന്റെയും വരവ് ഹൈദരാബാദിന്റെ പേസ് നിരയ്ക്ക് കരുത്തേകുമെന്നാണ് വിലയിരുത്തൽ.

ഹാർദിക് പാണ്ഡ്യയ്ക്ക് പകരം അർഷ്ദീപ് സിങ്?
ട്രേഡ് വിപണിയിലെ ഏറ്റവും വലിയ ചർച്ച മുംബൈ ഇന്ത്യൻസും പഞ്ചാബ് കിങ്‌സും തമ്മിലുള്ള കൈമാറ്റമാണ്. ഹാർദിക് പാണ്ഡ്യയും അർഷ്ദീപ് സിങ്ങും ഉൾപ്പെട്ട ട്രേഡ് ചർച്ചകൾ അന്തിമ ഘട്ടത്തിലാണെന്നാണ് പുറത്തുവരുന്ന റിപ്പോർട്ടുകൾ. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണം ലഭിച്ചിട്ടില്ല.

കൈമാറ്റം യാഥാർഥ്യമായാൽ ഇരു ടീമുകൾക്കും നിർണായകമായ മാറ്റമായിരിക്കും ഇത്. അർഷ്ദീപിന്റെ വരവ് മുംബൈയുടെ ബൗളിങ് നിരയിലെ പ്രധാന പോരായ്മകൾ പരിഹരിക്കാൻ സഹായിക്കും. ജസ്പ്രീത് ബുംറയ്ക്കൊപ്പം അർഷ്ദീപ് കൂടി ചേരുന്നതോടെ ന്യൂബോളിലും ഡെത്ത് ഓവറുകളിലും മികച്ച പ്രകടനം നടത്താൻ ശേഷിയുള്ള പേസ് നിര മുംബൈയ്ക്ക് സ്വന്തമാകും.

ട്രെന്റ് ബോൾട്ടിന്റെയും ദീപക് ചാഹറിന്റെയും മോശം ഫോമും ബൗളിങ് നിരയുടെ സ്ഥിരതയില്ലായ്മയും കഴിഞ്ഞ സീസണിൽ മുംബൈയെ ബാധിച്ചിരുന്നു. ഈ സാഹചര്യത്തിൽ അർഷ്ദീപിന്റെ വരവ് ടീമിന് വലിയ നേട്ടമാകുമെന്നാണ് വിലയിരുത്തൽ.

മറുവശത്ത് ഹാർദിക് പാണ്ഡ്യയുടെ വരവ് പഞ്ചാബ് കിങ്‌സിന്റെ ഓൾറൗണ്ട് കരുത്ത് വർധിപ്പിക്കും. മാർക്കസ് സ്റ്റോയിനിസ് ടീമിലുണ്ടെങ്കിലും സ്ഥിരതയില്ലാത്ത പ്രകടനം പഞ്ചാബിന് ആശങ്കയാണ്. ബാറ്റിങ്ങിലും ബൗളിങ്ങിലും ഒരുപോലെ സംഭാവന നൽകാൻ കഴിയുന്ന ഹാർദിക് ടീമിന്റെ ബാലൻസ് മെച്ചപ്പെടുത്തും.

എന്നാൽ ഹാർദിക്കിന് പഞ്ചാബിൽ ക്യാപ്റ്റൻസി ലഭിക്കുമോ എന്ന കാര്യത്തിൽ വ്യക്തതയില്ല. കഴിഞ്ഞ അഞ്ച് വർഷമായി ഐപിഎല്ലിൽ ക്യാപ്റ്റനെന്ന നിലയിൽ ശ്രദ്ധ നേടിയ താരത്തിന് പുതിയ ടീമിൽ ആ ഉത്തരവാദിത്വം ലഭിക്കാത്തത് ശ്രദ്ധേയമായ മാറ്റമായിരിക്കും.

ട്രേഡ് വിപണിയിൽ ഇനി നിർണായക ഏഴ് ദിവസങ്ങൾ
ഐപിഎൽ 2027-ന് മുന്നോടിയായുള്ള താരക്കൈമാറ്റങ്ങൾ ഫ്രാഞ്ചൈസികളുടെ ടീം ഘടനയിൽ വലിയ മാറ്റങ്ങൾക്ക് വഴിയൊരുക്കുകയാണ്. ഔദ്യോഗികമായ കൈമാറ്റങ്ങൾക്കൊപ്പം ഹാർദിക്–അർഷ്ദീപ്, അക്‌സർ പട്ടേൽ തുടങ്ങിയ താരങ്ങളെ ചുറ്റിപ്പറ്റിയുള്ള ചർച്ചകളും സജീവമാണ്. ട്രേഡ് വിൻഡോ അവസാനിക്കാൻ ദിവസങ്ങൾ മാത്രം ശേഷിക്കെ ഇനി ഏതൊക്കെ വമ്പൻ നീക്കങ്ങൾ യാഥാർഥ്യമാകുമെന്ന ആകാംക്ഷയിലാണ് ക്രിക്കറ്റ് ആരാധകർ.