അർജന്റീന ദേശീയ ഫുട്ബോൾ ടീമിന്റെ പരിശീലകനായി ലയണൽ സ്കലോണി തുടരും. 2030 ലോകകപ്പ് വരെ നീളുന്ന പുതിയ കരാറിൽ അർജന്റീന ഫുട്ബോൾ അസോസിയേഷൻ (എഎഫ്എ) സ്കലോണിയുമായി ധാരണയിലെത്തി. ഇതോടെ സ്കലോണിയുടെ ഭാവിയെക്കുറിച്ച് നിലനിന്നിരുന്ന അഭ്യൂഹങ്ങൾക്കും അനിശ്ചിതത്വങ്ങൾക്കും വിരാമമായി.
2026 ലോകകപ്പിന് ശേഷവും സ്കലോണി അർജന്റീനയ്ക്കൊപ്പം തുടരുമോ എന്ന കാര്യത്തിൽ നേരത്തെ സംശയങ്ങൾ ഉയർന്നിരുന്നു. ഇതിഹാസ താരം ലയണൽ മെസിയുടെ ദേശീയ ടീം കരിയറിന് വിരാമമാകുന്നതോടെ സ്കലോണിയും പരിശീലക സ്ഥാനം ഒഴിയുമെന്ന തരത്തിലുള്ള റിപ്പോർട്ടുകളും പുറത്തുവന്നിരുന്നു. എന്നാൽ പുതിയ കരാറിലൂടെ 2030 ലോകകപ്പ് വരെയും ടീമിനെ നയിക്കാൻ സ്കലോണിക്ക് അവസരം ലഭിക്കുകയാണ്.
അർജന്റീനയുടെ സമീപകാല ഫുട്ബോൾ ചരിത്രത്തിലെ ഏറ്റവും മികച്ച പരിശീലകരിലൊരാളാണ് സ്കലോണി. 2021ൽ ബ്രസീലിനെ പരാജയപ്പെടുത്തി കോപ്പ അമേരിക്ക കിരീടം നേടിയതോടെയാണ് അദ്ദേഹത്തിന്റെ പരിശീലന മികവ് ശ്രദ്ധിക്കപ്പെട്ടത്. 28 വർഷത്തെ കിരീടവരൾച്ചയ്ക്കാണ് അന്ന് അർജന്റീന വിരാമമിട്ടത്.
പിന്നീട് ഇറ്റലിയെ തോൽപിച്ച് ഫൈനലിസിമ കിരീടവും സ്വന്തമാക്കി. 2022 ഖത്തർ ലോകകപ്പിൽ ഫ്രാൻസിനെ തോൽപിച്ച് അർജന്റീനയെ ലോകചാമ്പ്യന്മാരാക്കിയതും സ്കലോണിയുടെ നേതൃത്വത്തിലായിരുന്നു. 2024ൽ വീണ്ടും കോപ്പ അമേരിക്ക കിരീടം നേടിയതോടെ ദേശീയ ടീമിനൊപ്പമുള്ള അദ്ദേഹത്തിന്റെ നേട്ടങ്ങളുടെ പട്ടിക കൂടുതൽ വിപുലമായി.
തുടർച്ചയായ കിരീടനേട്ടങ്ങളിലൂടെ അർജന്റീന ഫുട്ബോളിൽ പുതിയ അധ്യായം രചിച്ച സ്കലോണിക്ക് പുതിയ കരാർ വലിയ ഉത്തരവാദിത്തമാണ് നൽകുന്നത്. 2030 ലോകകപ്പിലും അർജന്റീനയുടെ കിരീടപ്രതീക്ഷകൾക്ക് നേതൃത്വം നൽകുക എന്നതാകും ഇനി അദ്ദേഹത്തിന് മുന്നിലുള്ള പ്രധാന ലക്ഷ്യം.
