കൊച്ചി: തന്നെ ‘സാംസ്‌കാരിക നായിക’ എന്ന് വിശേഷിപ്പിക്കരുതെന്ന അഭ്യർഥനയുമായി എഴുത്തുകാരി സാറാ ജോസഫ്. താൻ ഒരു എഴുത്തുകാരി മാത്രമാണെന്നും സമൂഹത്തിലെ ഏതൊരു വ്യക്തിയെയും പോലെ ശരിയെന്ന് തോന്നുന്ന കാര്യങ്ങൾ തുറന്നുപറയുകയാണ് ചെയ്തിട്ടുള്ളതെന്നും അവർ വ്യക്തമാക്കി. സമൂഹമാധ്യമത്തിലൂടെയായിരുന്നു സാറാ ജോസഫിന്റെ പ്രതികരണം.
കൂട്ട ഒപ്പിടീക്കൽ പ്രസ്ഥാനങ്ങൾ മുന്നോട്ടുവയ്ക്കുന്ന പ്രസ്താവനകളിൽ ശരിയെന്ന് തോന്നുന്ന കാര്യങ്ങളോട് മാത്രമാണ് താൻ ഐക്യപ്പെടുകയും ഒപ്പുവെക്കുകയും ചെയ്യുന്നതെന്ന് സാറാ ജോസഫ് കുറിച്ചു.
മാധ്യമ സുഹൃത്തുക്കളെങ്കിലും തന്നെ ‘സാംസ്‌കാരിക നായിക’ എന്ന വിശേഷണം ഉപയോഗിച്ച് വിളിക്കരുതെന്നും അവർ അഭ്യർഥിച്ചു. ആ വിശേഷണം തനിക്ക് ഇഷ്ടമല്ലെന്നും താൻ ഒന്നിന്റെയും നായികയല്ലെന്നും സാറാ ജോസഫ് വ്യക്തമാക്കി.
ഒരു എഴുത്തുകാരി എന്ന നിലയിൽ തന്റെ നിലപാടുകളും അഭിപ്രായങ്ങളും തുറന്നുപറയുക മാത്രമാണ് ചെയ്യുന്നതെന്നും അതിന്റെ പേരിൽ പ്രത്യേക വിശേഷണങ്ങൾ ചാർത്തേണ്ടതില്ലെന്നുമാണ് സാറാ ജോസഫിന്റെ പ്രതികരണത്തിന്റെ ഉള്ളടക്കം.
