ഗുരുവായൂരമ്പലനടയിൽ വിവാഹിതയായി നടി മീര നന്ദന് . ലണ്ടനില് അക്കൗണ്ടന്റായ ശ്രീജുവാണ് വരന്. ഗുരുവായൂര് ക്ഷേത്രത്തില് വച്ചായിരുന്നു വിവാഹം. താലികെട്ടിന്റെയും സിന്ദൂരം ചാര്ത്തുന്നതിന്റെയും ചിത്രങ്ങള് മീര തന്നെയാണ് സമൂഹ മാധ്യമ അക്കൗണ്ടിലൂടെ പങ്കുവച്ചത്. കുടുംബാംഗങ്ങളും അടുത്ത സുഹൃത്തുക്കളുമാണ് വിവാഹത്തിനെത്തിയത്. ദീർഘനാളായി അഭിനയരംഗത്ത് നിന്ന് വിട്ട് നിന്ന മീരനന്ദൻ ദുബായിൽ റേഡിയോ ജോക്കിയാണ്.
നടിയുടെ മെഹെന്ദി ചടങ്ങും വൻ ആഘോഷമായിരുന്നു. അടുത്ത കൂട്ടുകാരായ ആൻ അഗസ്റ്റിൻ, നസ്രിയ നസിം, ശ്രിന്ദ എന്നിവർ മെഹെന്ദി കളറാക്കാൻ എത്തിയിരുന്നു.
കഴിഞ്ഞ വർഷം സെപ്റ്റംബർ മാസത്തിലാണ് മീര നന്ദനും ശ്രീജുവുമായുള്ള വിവാഹനിശ്ചയം നടന്നത്.വീട്ടുകാർ നിശ്ചയിച്ചുറപ്പിച്ച വിവാഹമാണ് മീരയുടേത്. മാട്രിമോണി സൈറ്റ് വഴി ഇരുവരും ആദ്യം പരിചയപ്പെട്ടെങ്കിലും, പിന്നീട് വീട്ടുകാരുടെ സാന്നിധ്യത്തിൽ വിവാഹം ഉറപ്പിക്കുകയായിരുന്നു.
2008 ലാണ് മീരയുടെ സിനിമാ അരങ്ങേറ്റം. തൊട്ടടുത്ത വര്ഷം വാല്മീകി എന്ന ചിത്രത്തിലൂടെ തമിഴിലും 2011 ല് ജയ് ബോലോ തെലങ്കാന എന്ന ചിത്രത്തിലൂടെ തെലുങ്കിലും 2014 ല് കരോട്പതി എന്ന ചിത്രത്തിലൂടെ കന്നഡയിലും അരങ്ങേറി.
2017നുശേഷം ആറുവര്ഷത്തോളം മീര നന്ദൻ സിനിമയിൽ അഭിനയിച്ചിരുന്നില്ല. 2023ൽ വർഷം പുറത്തിറങ്ങിയ ‘എന്നാലും ന്റളിയാ’ എന്ന ചിത്രത്തിൽ അതിഥിവേഷത്തിൽ മീര പ്രത്യക്ഷപ്പെട്ടിരുന്നു.
