ഫിന്ജാല് ചുഴലിക്കാറ്റായി ശക്തി പ്രാപിക്കുന്നുവെന്ന് കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഇന്ന് വൈകുന്നേരത്തോടെ തെക്ക് പടിഞ്ഞാറന് ബംഗാള് ഉള്ക്കടലിന് മുകളിലെ ഫിന്ജാല് കര തൊടും. കാരക്കലിനും മഹാബലിപുരത്തിനും ഇടയില് പുതുച്ചേരിക്ക് സമീപം മണിക്കൂറില് പരമാവധി 90 കിലോ മീറ്റര് വരെ വേഗതയില് കരയില് പ്രവേശിക്കാന് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ഇതേ തുടര്ന്ന് ചെന്നൈ വിമാനത്താവളം വൈകിട്ട് 7 മണി വരെ അടച്ചിടുമെന്ന് അധികൃതര് അറിയിച്ചു.
വടക്കന് തമിഴ്നാട്, പുതുച്ചേരി, തെക്കന് ആന്ധ്രാ തീരത്ത് ചുഴലിക്കാറ്റ് റെഡ് അലര്ട്ട് നല്കി. തമിഴ്നാട്ടിലെ ഏഴ് തീരദേശ ജില്ലകളില് അതിശക്തമായ മഴയ്ക്ക് സാധ്യതയുള്ളതിനാല് കാലാവസ്ഥാ വകുപ്പ് റെഡ് അലര്ട്ട് പ്രഖ്യാപിച്ചു. ചെന്നൈ, തിരുവള്ളൂര്, കാഞ്ചീപുരം, കല്ലുറിച്ചി, കടലൂര്, പുതുച്ചേരി ജില്ലകളില് കനത്ത മഴ തുടരുകയാണ്.
