വിശാഖപട്ടണം: ബംഗാൾ ഉൾക്കടലിൽ രൂപംകൊള്ളുന്ന അർണാബ് ചുഴലിക്കാറ്റ് ഒക്ടോബർ 28ന് ആന്ധ്രപ്രദേശ് തീരത്ത് കരതൊടാൻ സാധ്യതയെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ബാപട്‌ലക്കും വിശാഖപട്ടണത്തിനും ഇടയിലുള്ള തീരമേഖലയിലാകും ചുഴലിക്കാറ്റ് പ്രവേശിക്കുകയെന്നാണ് പ്രവചനം. മണിക്കൂറിൽ 115 മുതൽ 125 കിലോമീറ്റർ വരെ വേഗത്തിൽ കാറ്റ് വീശാനും ശക്തമായ കാറ്റിന്റെ വേഗം 140 കിലോമീറ്റർ വരെ ഉയരാനും സാധ്യതയുണ്ട്.
ബംഗാൾ ഉൾക്കടലിലെ ന്യൂനമർദം ശക്തിപ്രാപിച്ച് ഒക്ടോബർ 26ഓടെ ചുഴലിക്കാറ്റായി മാറുമെന്നും 27ന് കൂടുതൽ ശക്തി കൈവരിക്കുമെന്നുമാണ് പ്രവചനം. തുടർന്ന് അതിതീവ്ര ചുഴലിക്കാറ്റായി മാറി ആന്ധ്രപ്രദേശ് തീരത്തേക്ക് നീങ്ങാൻ സാധ്യതയുണ്ട്.
ചുഴലിക്കാറ്റിന്റെ പ്രഭാവത്തിൽ ആന്ധ്രപ്രദേശിലെയും ഒഡിഷയിലെയും വിവിധ ജില്ലകളിൽ അതിശക്തമായ മഴയ്ക്കും ഒറ്റപ്പെട്ട ഇടങ്ങളിൽ അതിതീവ്ര മഴയ്ക്കും സാധ്യതയുണ്ട്. ഒക്ടോബർ 27, 28 തീയതികളിൽ ഉത്തര ആന്ധ്രപ്രദേശ് ഉൾപ്പെടെയുള്ള തീരമേഖലകളിൽ ശക്തമായ മഴയും കാറ്റും ഉണ്ടാകുമെന്നാണ് മുന്നറിയിപ്പ്.
അപകടസാധ്യതയുള്ള പ്രദേശങ്ങളിൽ താമസിക്കുന്നവർ അധികൃതരുടെ നിർദേശങ്ങൾ പാലിക്കണമെന്നും ആവശ്യമായാൽ സുരക്ഷിത കേന്ദ്രങ്ങളിലേക്ക് മാറണമെന്നും നിർദേശമുണ്ട്. കടൽ പ്രക്ഷുബ്ധമാകാൻ സാധ്യതയുള്ളതിനാൽ മത്സ്യത്തൊഴിലാളികൾ കടലിൽ പോകരുതെന്നും മുന്നറിയിപ്പുകൾ കർശനമായി പാലിക്കണമെന്നും അധികൃതർ അറിയിച്ചു.
ചുഴലിക്കാറ്റിന്റെ സഞ്ചാരപഥത്തിലും തീവ്രതയിലും മാറ്റമുണ്ടാകാൻ സാധ്യതയുള്ളതിനാൽ ജനങ്ങൾ ഔദ്യോഗിക കാലാവസ്ഥാ മുന്നറിയിപ്പുകൾ ശ്രദ്ധിക്കണം.
