തിരുവനന്തപുരം: സ്കൂള് കലോത്സവത്തിലെ അവതരണഗാനത്തിന് നൃത്തം പഠിപ്പിക്കാന് നടി അഞ്ച് ലക്ഷം രൂപ പ്രതിഫലം ആവശ്യപ്പെട്ടെന്ന വിദ്യാഭ്യാസ മന്ത്രി വി ശിവന്കുട്ടിയുടെ വെളിപ്പെടുത്തലില് പ്രതികരണവുമായി നര്ത്തകിയും നടിയുമായ ആശാ ശരത്. പ്രതിഫലം വാങ്ങുന്നത് വ്യക്തിപരമായ കാര്യമാണെന്നും മറ്റുള്ളവര് പ്രതിഫലം വാങ്ങുന്നതില് അഭിപ്രായം പറയുന്നത് ഉചിതമല്ലെന്നും ആശാ ശരത് പ്രതികരിച്ചു.
പ്രതിഫലം വാങ്ങാതെയാണ് താന് കഴിഞ്ഞ വര്ഷം സംസ്ഥാന സ്കൂള് കലോത്സവത്തില് നൃത്തം ഒരുക്കിയത്. സ്വന്തം ചെലവിലാണ് ദുബൈയില് നിന്നും കുട്ടികളുമായി എത്തി നൃത്തവേദി പങ്കിട്ടതെന്നും ആശാ ശരത് പറഞ്ഞു. 2022 ലെ കലോത്സവത്തില് മുഖ്യാതിഥിയായി പങ്കെടുക്കവേ കുട്ടികള്ക്ക് നല്കിയ വാക്കാണ് പാലിച്ചത്. കുട്ടികള്ക്കൊപ്പമായതിനാല് മാത്രമാണ് പ്രതിഫലം വാങ്ങാതിരുന്നതെന്നും ആശാ ശരത് പറഞ്ഞു.
