തിരുവനന്തപുരം: പാറശ്ശാല ഷാരോണ് വധക്കേസില് വിധി തിങ്കളാഴ്ച പറയും. കോടതിയില് അന്തിമവാദം പൂര്ത്തിയായി. ഇത് അപൂര്വങ്ങളില് അപൂര്വ്വമായ കേസ് ആണെന്ന് പ്രോസിക്യൂഷന് വാദിച്ചു. ഗ്രീഷ്മയ്ക്ക് ചെകുത്താന്റെ സ്വഭാവമാണെന്നും ക്രൂരനായ ഒരു കുറ്റവാളിക്ക് മാത്രമാണ് ഇങ്ങനെ ഒരു കൃത്യം ചെയ്യാന് കഴിയുകയുള്ളുവെന്നും പ്രോസിക്യൂഷന് വാദിച്ചു. പരമാവധി ശിക്ഷ നല്കണമെന്ന ആവശ്യമാണ് അഭിഭാഷകന് മുന്നോട്ട് വെച്ചിരിക്കുന്നത്.
ഒരു ചെറുപ്പക്കാരന്റെ സ്നേഹത്തെയാണ് ഗ്രീഷ്മ കൊലപ്പെടുത്തിയത്. സ്നേഹം നടിച്ച് വീട്ടിലേക്ക് വിളിച്ചുവരുത്തി കൊലപാതകം നടത്തുകയായിരുന്നു. 11 ദിവസം ഷാരോണ് അനുഭവിച്ച വേദന ഡോക്ടര്മാരുടെ മൊഴിയില് ഉണ്ട്. പ്രതിക്ക് മനസ്താപം ഉണ്ടാകില്ല. അതുകൊണ്ടുതന്നെ പ്രതിഒരു ദയയും അര്ഹിക്കുന്നില്ലെന്നും പ്രോസിക്യൂഷന് വാദിച്ചു.
ഗ്രീഷ്മയ്ക്ക് എന്തെങ്കിലും പറയാനുണ്ടോ എന്ന കോടതിയുടെ ചോദ്യത്തിന് ഗ്രീഷ്മ കോടതിയില് കത്ത് നല്കി. പഠിക്കണമെന്നും ശിക്ഷയില് പരമാവധി ഇളവ് അനുവദിക്കണമെന്നും ഗ്രീഷ്മ ആവശ്യപ്പെട്ടു. തനിക്ക് 24 വയസ്സ് മാത്രമാണ് പ്രായം. അച്ഛനും അമ്മയക്കും ഒറ്റമകളാണ് താന്. മുന്പ് ക്രിമിനല് പശ്ചാത്തലമില്ലെന്നും പ്രതിഭാഗം വാദം ഉന്നയിച്ചു.
