കൊച്ചി: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച ശേഷം ഗൾഫിലേക്ക് നാടുവിട്ട പ്രതിയെ ഇന്റർപോളിന്റെ സഹായത്തോടെ പിടികൂടി. മൂവാറ്റുപുഴ രണ്ടാർക്കര സ്വദേശി സുഹൈൽ (27 ) നെയാണ് ഒന്നര വർഷത്തിനുശേഷം പിടിയിലായത്. 2022 ലാണ് കേസിനാസ്പദമായ സംഭവം. പ്രതി പെൺകുട്ടിയുടെ വീട്ടിൽ അതിക്രമിച്ചു കയറി പീഡിപ്പിക്കുകയായിരുന്നു.
2023 ൽ പോലീസ് കേസിന്റെ അന്വേഷണം പൂർത്തിയാക്കി കുറ്റപത്രം മൂവാറ്റുപുഴ പോക്സോ കോടതിയിൽ സമർപ്പിച്ചിരുന്നു. പ്രതിക്കെതിരെ കോടതി വാറണ്ട് പുറപ്പെടുവിച്ചെങ്കിലും ഹാജരായില്ല. പിന്നീട് ലുക്ക് ഔട്ട് നോട്ടീസും പുറപ്പെടുവിച്ചു. തുടർന്ന് പോലീസ് അബുദാബിയിലെത്തി ഇന്റർപോളിന്റെ സഹായത്തോടെ പ്രതിയെ പിടിക്കൂടി നാട്ടിലെത്തിച്ചു.
ജില്ലാ പോലീസ് മേധാവി ഡോ. വൈഭവ് സക്സേനയുടെ നേതൃത്തിലാണ് നടപടിക്രമങ്ങള് നടന്നത്. മൂവാറ്റുപുഴ സർക്കിൾ ഇന്സ്പെക്ടര് ബേസില് തോമസ്, എസ്ഐമാരായ എം.പി.ദിലീപ് കുമാര്, എം.എം. ഉബൈസ്, സീനിയര് സിവില് പോലീസ് ഓഫീസര് ധനേഷ് ബി. നായര് എന്നിവരാണ് അന്വേക്ഷണ സംഘത്തിലുണ്ടായിരുന്നത്.
