ബെംഗളൂരു: കര്ണാടകയിലെ സിര്സിയില് അങ്കണവാടിയില് നിന്ന് മൂത്രമൊഴിക്കാന് അങ്കണവാടിയുടെ പുറത്തേക്ക് പോയ 5 വയസുകാരി പാമ്പുകടിയേറ്റ് മരിച്ചു. അഞ്ച് വയസ്സുള്ള മയൂരി സുരേഷ് കുമ്പളപ്പെനവര് ആണ് മരിച്ചത്. സിര്സിയിലെ മാരിക്കമ്പ സിറ്റിയിലെ അങ്കണവാടിയില് ഇന്നലെയാണ് സംഭവം. മൂത്രമൊഴിക്കാന് അങ്കണവാടിക്ക് പുറത്തുള്ള പറമ്പിലേക്ക് പോയപ്പോള് പാമ്പുകടിയേല്ക്കുകയായിരുന്നു.
കുട്ടിക്ക് പാമ്പുകടിയേറ്റെന്ന് വ്യക്തമായിട്ടും ആന്റിവെനം നല്കാതെ ഹുബ്ബള്ളിയിലെ മെഡിക്കല് കോളേജിലേക്ക് അയക്കുകയാണ് പ്രാദേശിക ആശുപത്രിയിലെ ഡോക്ടര് ചെയ്തത്. ഹുബ്ബള്ളിയിലെത്തും മുമ്പ് കുട്ടിക്ക് മരണം സംഭവിച്ചിരുന്നു. ഇതോടെ ഡ്യൂട്ടി ഡോക്ടറുടെ ഭാഗത്ത് നിന്ന് കടുത്ത അനാസ്ഥ ഉണ്ടായെന്നും അങ്കണവാടിക്ക് ചുറ്റുമതിലോ നല്ല ശുചിമുറിയോ ഇല്ലെന്നും നാട്ടുകാര് ആരോപിച്ചു.
