കണ്ണൂർ: പയ്യാമ്പലം നീർക്കടവ് ബീച്ചിൽ കടലിൽ കുളിക്കാനിറങ്ങുന്നതിനിടെ ഒഴുക്കിൽപ്പെട്ട വിദ്യാർത്ഥിയെ അതിസാഹസികമായി രക്ഷപ്പെടുത്തി. നീർക്കടവ് സ്വദേശി അഭിലാഷാണ് സ്വന്തം ജീവൻ പണയപ്പെടുത്തി യുവാവിനെ മരണമുഖത്തുനിന്ന് തിരികെ ജീവിതത്തിലേക്ക് എത്തിച്ചത്.മംഗലാപുരത്തെ ഒരു കോളേജിൽ നിന്ന് വിനോദയാത്രയ്ക്ക് എത്തിയ വിദ്യാർത്ഥി സംഘമാണ് വൈകുന്നേരത്തോടെ ബീച്ചിലെത്തിയത്. കടലിൽ ഇറങ്ങിയ സംഘത്തിലെ ഒരു യുവാവ് ശക്തമായ തിരമാലയിലും അടിയൊഴുക്കിലും പെട്ട് പെട്ടെന്ന് ദൂരേക്ക് ഒലിച്ചുപോകുകയായിരുന്നു.
കൂടെയുണ്ടായിരുന്ന സുഹൃത്തുക്കൾ പരിഭ്രാന്തരായി നിലവിളിച്ചതോടെ പരിസരത്തുണ്ടായിരുന്ന അഭിലാഷ് ഒട്ടും വൈകാതെ കടലിലേക്ക് എടുത്തുചാടി.ശക്തമായ അടിയൊഴുക്കിനെ അവഗണിച്ച് നടത്തിയ തിരച്ചിലിനൊടുവിൽ വിദ്യാർത്ഥിയെ സുരക്ഷിതമായി കരയ്ക്കെത്തിക്കാൻ ഇദ്ദേഹത്തിന് സാധിച്ചു. വിവരമറിഞ്ഞ് കോസ്റ്റൽ വാർഡനും പോലീസും ഉടൻ സ്ഥലത്തെത്തി. കൃത്യസമയത്ത് ഇടപെട്ട് വലിയൊരു ദുരന്തം ഒഴിവാക്കിയ അഭിലാഷിനെ പോലീസും നാട്ടുകാരും ചേർന്ന് അഭിനന്ദിച്ചു. രക്ഷപ്പെട്ട വിദ്യാർത്ഥി നിലവിൽ അപകടനില തരണം ചെയ്തതായി അധികൃതർ അറിയിച്ചു.
