പൊതുവേദിയിൽ കുഴഞ്ഞുവീണ് നടൻ വിശാൽ. ഞായറാഴ്ച വൈകുന്നേരം തമിഴ്നാട്ടിലെ വില്ലുപുരത്ത് നടന്ന ഒരു പരിപാടിയിൽ പങ്കെടുക്കാനെത്തിയതായിരുന്നു താരം. വില്ലുപുരത്ത് സംഘടിപ്പിച്ച സൗന്ദര്യമത്സരത്തിന് ആശംസകള് അറിയിച്ച് തിരിച്ചു പോകവെയാണ് നടന് ബോധരഹിതനായി കുഴഞ്ഞുവീണത്. ഉടൻ തന്നെ നടനെ ആശുപത്രിയില് എത്തിക്കുകയും ചെയ്തു. നടന്റെ ആരോഗ്യനില തൃപ്തികരമാണ് എന്നാണ് റിപ്പോര്ട്ടുകള്.ആരോഗ്യം പെട്ടന്ന് മോശമായതിനാൽ ആരാധകരും ആശങ്കയിലാണ്. സംഭവത്തിന്റെ വിഡിയോകൾ സോഷ്യൽ മീഡിയയിൽ വ്യാപകമായി പ്രചരിപ്പിക്കുന്നുണ്ട്.
വിഡിയോയിൽ വിശാൽ വേദിയിൽ തന്റെ അടുത്തുള്ളവരുമായി സംസാരിക്കുന്നത് കാണാം. പെട്ടെന്ന് അദ്ദേഹം കുഴഞ്ഞുവീണു, പരിപാടിയിൽ പങ്കെടുത്തവരിൽ പരിഭ്രാന്തി പരത്തി. ഇവന്റ് മാനേജ്മെന്റ് ടീം അദ്ദേഹത്തെ അടുത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു. തുടർന്ന് അടിയന്തര ചികിത്സ നൽകി. വിശാലിന് അസുഖമുണ്ടെന്ന് അദ്ദേഹത്തിന്റെ മാനേജർ ഹരി കൃഷ്ണൻ മാധ്യമങ്ങളെ അറിയിച്ചു. കടുത്ത പനിയും ക്ഷീണവും ഉണ്ടായിരുന്നു. ഭക്ഷണം ഒഴിവാക്കുന്നതും കർശനമായ ഷെഡ്യൂളുമാണ് ആരോഗ്യ നില വഷളാക്കിയതെന്ന് വിശാലിന്റെ മാനേജർ അറിയിച്ചു.
2025 ജനുവരിയിൽ, ചെന്നൈയിൽ നടന്ന മധ ഗജ രാജയുടെ പ്രീ-റിലീസ് പരിപാടിയിൽ ജനക്കൂട്ടത്തെ അഭിസംബോധന ചെയ്യുമ്പോൾ നടന്റെ കൈകൾ വിറക്കുന്ന വിഡിയോ വൈറലായിരുന്നു. വിശാൽ ഇപ്പോൾ ആശുപത്രിയിൽ സുഖം പ്രാപിച്ചുവരുന്നു. ആരോഗ്യ സ്ഥിതിയെക്കുറിച്ച് അദ്ദേഹത്തിന്റെ ടീം ഇതുവരെ ഔദ്യോഗിക പ്രസ്താവന നടത്തിയിട്ടില്ല.
