ന്യൂഡൽഹി: മുഖ്യമന്ത്രി വി.ഡി. സതീശനെതിരായ പരാതിയിൽ നിന്ന് പിന്നോട്ടില്ലെന്ന നിലപാടിൽ യുഡിഎഫ് കൺവീനർ അടൂർ പ്രകാശ്. ഹൈക്കമാൻഡ് നേതൃത്വവുമായി കൂടിക്കാഴ്ച നടത്തുന്നതിനായി ദില്ലിയിലെത്തിയ അടൂർ പ്രകാശ് കോൺഗ്രസ് അധ്യക്ഷൻ മല്ലികാർജുൻ ഖർഗെയെയും രാഹുൽ ഗാന്ധിയെയും കാണാൻ ശ്രമം തുടരുകയാണ്. എന്നാൽ, ഇതുവരെ ഇരുവരും കൂടിക്കാഴ്ചയ്ക്ക് സമയം അനുവദിച്ചതായി സൂചനയില്ല.
മുഖ്യമന്ത്രിക്കെതിരായ പരാതിയിൽ നിന്ന് പിന്നോട്ടില്ലെന്നാണ് അടൂർ പ്രകാശിന്റെ നിലപാട്. പാർട്ടിയും സർക്കാരും തമ്മിലുള്ള ഏകോപനത്തിലെ പ്രശ്നങ്ങളും മുന്നണിയിൽ ചർച്ച ചെയ്യാതെ മുഖ്യമന്ത്രി തീരുമാനങ്ങളെടുത്തുവെന്ന ആരോപണങ്ങളും ഉൾപ്പെടുത്തി പ്രത്യേക പരാതി ഖർഗെയ്ക്കും രാഹുൽ ഗാന്ധിക്കും നൽകാനാണ് നീക്കം.
യുഡിഎഫിലെ പ്രധാന കക്ഷിയായ മുസ്ലിം ലീഗ് നേതാവ് എം.കെ. മുനീറിനെ ഭരണപരിഷ്കാര കമ്മീഷൻ ചെയർമാനായും ഫോർവേഡ് ബ്ലോക്ക് നേതാവ് ജി. ദേവരാജനെ ദില്ലിയിലെ സർക്കാരിന്റെ പ്രത്യേക പ്രതിനിധിയായും നിയമിച്ച തീരുമാനങ്ങൾ മുന്നണിയിൽ ചർച്ച ചെയ്തില്ലെന്നാണ് അടൂർ പ്രകാശിന്റെ ആരോപണം.
