തെന്നിന്ത്യയില് യുവ നിരയില് ശ്രദ്ധയാകര്ഷിച്ച താരമാണ് വിജയ് ദേവെരകൊണ്ട. സമീപകാലത്ത് വൻ വിജയങ്ങള് നേടാൻ വിജയ് ദേവെരകൊണ്ടയ്ക്ക് കഴിഞ്ഞിരുന്നില്ല. അതിനാല് ഇനി വരാനിരിക്കുന്ന കിങ്ഡം താരത്തെ സംബന്ധിച്ച് നിര്ണായകമാണ്. ഇപ്പോൾ ചിത്രത്തിലെ ഒരു ഗാനം പുറത്തുവിട്ടിരിക്കുകയാണ്.
വിജയ് ദേവരകൊണ്ട നായകനാകുന്ന കിങ്ഡത്തിലെ രഗിലേ രഗിലേ എന്ന ഗാനമാണ് പുറത്തുവിട്ടിരിക്കുന്നത്. അനിരുദ്ധ് രവിചന്ദറാണ് സംഗീത സംവിധാനം. വിജയ് ദേവെരകൊണ്ട നായകനാകുന്ന ചിത്രത്തിന് അനിരുദ്ധ് രവിചന്ദര് വാങ്ങിക്കുന്ന പ്രതിഫലവും ചര്ച്ചയാകുന്നുമുണ്ട്. കിങ്ഡം എന്ന ചിത്രത്തിനായി 12 കോടി രൂപയാണ് അനിരുദ്ധ് രവിചന്ദര് പ്രതിഫലം വാങ്ങിക്കുന്നത്. പശ്ചാത്തല സംഗീതത്തിനായി അനിരുദ്ധ് രവിന്ദര് സമയം അധികമെടുത്തതിനാലാണ് കിങ്ഡം വൈകിയത് എന്നും റിപ്പോര്ട്ടുണ്ട്. ജൂലൈ 31ന് ആണ് ചിത്രത്തിന്റെ റിലീസ്. ആക്ഷന് ഡ്രാമ ഗണത്തില് പെടുന്ന ചിത്രത്തില് ശാരീരികമായി വലിയ മേക്കോവര് നടത്തിയാണ് ദേവരകൊണ്ട അഭിനയിച്ചിരിക്കുന്നത്. ചിത്രത്തിന്റെ സ്വഭാവത്തെപ്പറ്റി കൃത്യമായി പറയുന്ന ടീസറിന് 1.55 മിനിറ്റ് ദൈര്ഘ്യമാണ് ഉണ്ടായിരുന്നത്.
ജേഴ്സി അടക്കമുള്ള ചിത്രങ്ങളിലൂടെ ശ്രദ്ധ നേടിയ സംവിധായകന് ഗൗതം തിണ്ണനൂരിയാണ് കിങ്ഡമിന്റെ രചനയും സംവിധാനവും. മലയാളി സിനിമാപ്രേമികളെ സംബന്ധിച്ചും കൗതുകകരമായ ഒരു ക്രെഡിറ്റ് കാര്ഡ് ഈ ചിത്രത്തില് ഉണ്ട്. മലയാളികളായ ജോമോന് ടി ജോണും ഗിരീഷ് ഗംഗാധരനുമാണ് ചിത്രത്തിന്റെ ചായാഗ്രഹണം നിര്വ്വഹിച്ചിരിക്കുന്നത്. സിതാര എന്റര്ടെയ്ന്മെന്റ്സ്, ഫോര്ച്യൂണ് 4 സിനിമാസ് എന്നീ ബാനറുകളില് നാഗ വംശി എസും സായ് സൗജന്യയും ചേര്ന്നാണ് ചിത്രം നിര്മ്മിക്കുന്നത്. പ്രൊഡക്ഷന് ഡിസൈനിംഗിന് ഏറെ പ്രാധാന്യമുള്ള ചിത്രത്തില് ആ റോള് കൈകാര്യം ചെയ്തിരിക്കുന്നത് അവിനാഷ് കൊല്ലയാണ്. തെലുങ്കിന് പുറമെ തമിഴ്, ഹിന്ദി പതിപ്പുകളിലും ചിത്രം പ്രദര്ശനത്തിന് എത്തുന്നുണ്ട്. തെലുങ്ക് പതിപ്പില് ജൂനിയര് എന്ടിആര് ആണ് നറേറ്റര് ആയി എത്തുന്നത്. തമിഴില് ഈ സ്ഥാനത്ത് സൂര്യയും ഹിന്ദിയില് രണ്ബീര് കപൂറുമാണ്. സാമ്രാജ്യ എന്നാണ് ഹിന്ദി പതിപ്പിന്റെ പേര്.
