ന്യൂഡല്ഹി: അംബേദ്കറെക്കുറിച്ചുള്ള അമിത് ഷായുടെ വിവാദ പരാമര്ശത്തില് പ്രതിഷേധങ്ങള്ക്കിടെ പാര്ലമെന്റില് നാടകീയ സംഭവങ്ങള്. പ്രതിഷേധങ്ങള്ക്കിടെ തങ്ങളുടെ രണ്ട് എംപിമാരെ പ്രതിപക്ഷ നേതാവ് രാഹുല് ഗാന്ധി തള്ളിയെന്ന് ബിജെപി ആരോപിച്ച് രംഗത്ത് വന്നു.
പരിക്കേറ്റെന്ന് പറയുന്ന ബിജെപി എംപിമാരായ മുകേഷ് രജ്പുത്, പ്രതാപ് സാരംഗി എന്നിവരെ ഡല്ഹിയിലെ റാം മനോഹര് ലോഹ്യ ആശുപത്രിയിലെ തീവ്രപരിചരണ വിഭാഗത്തില് പ്രവേശിപ്പിച്ചു. രാഹുല്ഗാന്ധിയുടെ കൈയേറ്റത്തില് ബിജെപി എംപിമാര്ക്ക് ഗുരുതരമായി പരിക്കേറ്റെന്ന് പാര്ലമെന്ററികാര്യ മന്ത്രി കിരണ് റിജിജ്ജു ആരോപിച്ചു. സംഭവത്തില് രാഹുലിനെതിരെ ബിജെപി പോലീസില് പരാതി നല്കി. ഇതില് കേസെടുക്കുകയും ചെയ്തിട്ടുണ്ട്.
അതേസമയം ബിജെപി എംപിമാര് തന്നെ കൈയേറ്റം ചെയ്തെന്ന് ആരോപിച്ച് കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയും രംഗത്തെത്തി. ബിജെപി എംപിമാര് തന്നെ തള്ളി. താന് നിലത്തുവീണു. ശസ്ത്രക്രിയയ്ക്ക് വിധേയമായ എന്റെ കാല്മുട്ടുകള്ക്ക് പരിക്ക് പറ്റി എന്നും ഖാര്ഗെ ലോക്സഭാ സ്പീക്കര് ഓം ബിര്ളയ്ക്ക് അയച്ച കത്തില് പറഞ്ഞു.
ചൊവ്വാഴ്ച രാജ്യസഭയിലെ ചര്ച്ചയില് നടത്തിയ അംബേദ്കറെക്കുറിച്ചുള്ള വിവാദ പരാമര്ശത്തില് അമിത് ഷാ മാപ്പ് പറയണമെന്നും രാജിവെക്കണമെന്നും ആവശ്യപ്പെട്ട് പ്രതിപക്ഷ പാര്ട്ടി എംപിമാര് നടത്തിയ പ്രതിഷേധത്തിനിടെയാണ് സംഘര്ഷമുണ്ടായത്. ബിജെപി എംപിമാരാണ് തന്നെ തടയാനും ഭീഷണിപ്പെടുത്താനും ശ്രമിച്ചതെന്ന് രാഹുല് ഗാന്ധി പ്രതികരിച്ചു.
‘ഞാന് പാര്ലമെന്റിനുള്ളിലേക്ക് കയറാന് ശ്രമിക്കുകയായിരുന്നു, ബിജെപി എംപിമാര് എന്നെ തടയാന് ശ്രമിച്ചു. ഇതാണ് സംഭവിച്ചത്. ഞങ്ങള്ക്ക് പാര്ലമെന്റിനകത്തേക്ക് കയറാന് അവകാശമുണ്ട്’ രാഹുല് പറഞ്ഞു.
