പാലക്കാട്: കാവശ്ശേരി പഞ്ചായത്തിലെ ഏഴാം വാർഡിൽ വർഷങ്ങളായി അടഞ്ഞുകിടന്നിരുന്ന മലമ്പുഴ കനാൽ വൃത്തിയാക്കി പുനരുജ്ജീവിപ്പിച്ചു. കാവശ്ശേരി പഞ്ചായത്ത് അംഗം അഹമ്മദ് കബീർന്റെ നേതൃത്വത്തിലാണ് കനാൽ ശുചീകരണ പ്രവർത്തനങ്ങൾ നടത്തിയത്.
പ്രദേശത്തെ യുവാക്കളുടെ സജീവ പങ്കാളിത്തത്തോടെയായിരുന്നു ശുചീകരണ പ്രവർത്തനങ്ങൾ പൂര്ത്തിയാക്കിയത്.നാളുകളായി ചെളിയും മാലിന്യങ്ങളും നിറഞ്ഞുകിടന്നതിനാൽ കനാലിലൂടെ വെള്ളം ഒഴുകാൻ സാധിക്കാത്ത അവസ്ഥയായിരുന്നു. ഇതുമൂലം കൃഷിയിടങ്ങളിലേക്ക് ആവശ്യമായ ജലസേചന സൗകര്യം ലഭിക്കാതെ കർഷകർ ദുരിതം അനുഭവിക്കുകയായിരുന്നു.
ഈ സാഹചര്യത്തിലാണ് കൃഷി ആവശ്യങ്ങൾക്ക് ജലം ഉറപ്പാക്കുക എന്ന ലക്ഷ്യം മുൻനിർത്തി കനാൽ വൃത്തിയാക്കാനുള്ള നടപടി ആരംഭിച്ചത്.പ്രദേശത്തെ കുഴൽക്കിണറുകളും സാധാരണ കിണറുകളും വേനൽക്കാലത്ത് വറ്റിപ്പോകുന്നതോടെ കുടിവെള്ളക്ഷാമം രൂക്ഷമാകുന്ന സാഹചര്യമാണുള്ളതെന്ന് അഹമ്മദ് കബീർ പറഞ്ഞു. മലമ്പുഴ കനാൽ വൃത്തിയാക്കി വെള്ളം ഒഴുകാൻ തുടങ്ങുന്നതോടെ ഭൂഗർഭ ജലനിരപ്പ് ഉയരുകയും കുടിവെള്ളക്ഷാമം കുറയുകയും ചെയ്യുമെന്ന് അദ്ദേഹം പ്രതീക്ഷ പ്രകടിപ്പിച്ചു.കനാൽ ശുചീകരണം വഴി കൃഷി ആവശ്യത്തിനുള്ള ജലസേചന സൗകര്യം മെച്ചപ്പെടുന്നതിനൊപ്പം പ്രദേശത്തെ കുടിവെള്ള പ്രശ്നങ്ങൾക്കും പരിഹാരമാകുമെന്ന വിശ്വാസമാണ് നാട്ടുകാർ പങ്കുവെക്കുന്നത്. പഞ്ചായത്തിന്റെയും യുവജനങ്ങളുടെ കൂട്ടായ്മയുടെയും ഫലമായാണ് ഈ പ്രവർത്തനം വിജയകരമായി നടപ്പാക്കിയതെന്ന് നാട്ടുകാർ അറിയിച്ചു.
